Mbappe tanqidlarga javob berdi

“Real” hujumchisi Kilian Mbappe o‘ziga qaratilgan tanqidlarga javob qaytardi. Fransuz futbolchisining so‘zlariga ko‘ra, u tanqidlarni xotirjam qabul qiladi va Madrid klubida o‘zini juda yaxshi his qilmoqda. Bu haqda futbol jurnalisti Fabritsio Romano X sahifasida ma’lum qildi. 

“Hozir o‘zimni juda yaxshi his qilyapman. Men “Real Madrid”dagi eng yaxshi vaqtimni o‘tkazyapman. Juda xotirjamman va tanqid odatiy holdir. Odamlar salbiy so‘zlarni aytganda, xotirjam bo‘lish va oldinga intilish kerak”, deydi Mbappe.

Mbappe joriy mavsumda barcha turnirlarda 29 ta o‘yin o‘tkazib, 17 ta gol urdi va 3 ta golga assistentlik qildi. Futbolchining klub bilan amaldagi shartnomasi 2029 yilning yoziga qadar tuzilgan. “Transfermarkt” portalida berilgan ma’lumotlarga ko‘ra, futbolchining bozor qiymati 160 million yevroni tashkil qiladi.

Eslatib o‘tamiz, avvalroq Anchelotti Mbappeni dunyoning eng yaxshi markaziy hujumchisi sifatida tan olishi xabar qilingandi.