Mbappe “Real”da Ronaldu kabi tanishtirilishni xohlamoqda

Mavsum oxirida PSJni tark etishi kutilayotgan hujumchi Kilian Mbappe “Real”ga o‘tganidan so‘ng “Santyago Bernabeu”dagi taqdimoti tafsilotlarini ko‘rib chiqishga kirishdi. Bu haqda “El Chiringuito” xabar berdi.

Manbaga ko‘ra, birinchi navbatda, 25 yoshli futbolchi 2024 yilgi Yevropa chempionati boshlanishidan oldin rasmiy ravishda Madrid jamoasi muxlislari bilan ko‘rishishni istamoqda. Fransiyalik futbolchi PSJ bilan shartnomasi bo‘lsa ham, tezroq “Real” a’zosi sifatida tanishtirilishni xohlaydi. Mbappening PSJ bilan shartnomasi joriy yilning 30 iyuniga qadar amal qiladi. 

Ikkinchidan, Kilian taqdimotni portugaliyalik hujumchi Krishtianu Ronaldu 2009 yilda “Real Madrid”ga o‘tganidan keyin o‘tkazgan uslubda tashkil qilinishini istayapti.

Ma’lumot uchun, Mbappe 2017 yildan beri PSJda o‘ynab kelmoqda. 25 yoshli hujumchiparijliklar bilan 13 ta sovrin yutgan. Joriy mavsumda forvard barcha turnirlarda 31 ta o‘yin o‘tkazib, 32 ta gol va 7 ta golli uzatmaga mualliflik qildi. Futbolchining fransuz klubi bilan shartnomasi shu yilning iyun oyi oxirigacha amal qiladi. “Transfermarkt” internet portaliga ko‘ra futbolchining taxminiy narxi 180 million yevroni tashkil qiladi.