Mbappe operatsiya qilinmaydi

Madridning “Real” klubi shifokorlari hujumchi Kilian Mbappeni birinchi tibbiy ko‘rikdan o‘tganidan so‘ng, fransiyalik futbolchining burnini operatsiya qilish kerak emas, degan qarorga keldi. Bu haqda AS xabar berdi.

“Real Madrid” 16 iyul kuni “Santyago Bernabeu” stadionida Mbappening rasmiy taqdimot marosimini o‘tkazdi.

Manbaga ko‘ra, 25 yoshli Mbappe klub shifokorlari tomonidan muntazam ko‘rikdan o‘tadi. Uning ta’tildan qaytishi 8 avgustga belgilangan.

Qayd etish joiz, Mbappe Yevro-2024'ning ochilish uchrashuvida Avstriyaga qarshi (1:0) burnidan jarohat oldi. Fransiya terma jamoasi sardori Niderlandiyaga qarshi guruh bosqichining 2-tur o‘yinini o‘tkazib yubordi, keyingi bahslarda esa maxsus himoya niqobida o‘ynadi. 

Ma’lumot uchun, “Real” 3 iyun kuni Mbappe bilan 5 yillik shartnoma imzoladi. Hujumchi erkin agent sifatida Madrid klubiga o‘tdi. Uning “qirollik klubi” bilan kelishuvi 2029 yilning yoziga qadar mo‘ljallangan.