Mbappe Olimpiadada qatnashmoqchi

PSJ hujumchisi Kilian Mbappe yozda bo‘lib o‘tadigan Parij Olimpiadasida Fransiya olimpiya terma jamoasi safida o‘ynamoqchi. Bu haqda 2024 yilgi Olimpiada o‘yinlari tashkiliy qo‘mitasi prezidenti Toni Estange ma’lum qildi.

Fransiya terma jamoasi bosh murabbiyi Dide Desham Mbappening Olimpiadada Terri Anri boshchiligidagi olimpiya terma jamoasida o‘ynashida muammo ko‘rmayotganini aytdi. 

“Agar uning Olimpiadada ishtirok etish istagi bo‘lsa va buning imkoniyati bo‘lsa, unda muammo yo‘q. Ochig‘i, barchamizning istagimiz bir –Terri Anri turnirda raqobatbardosh jamoa bilan qatnashishini ta’minlash”, deydi Desham.

Qayd etish joiz, Olimpiadada 23 yoshgacha bo‘lgan futbolchilar ishtirok etishi mumkin va jamoalar tarkibga 23 yoshdan katta 3 nafar futbolchi kiritilishiga ruxsat beriladi.

Mbappeni Olimpiadada qatnashish-qatnashmasligi uning yozda PSJ bilan shartnomasini yangilashiga ham bog‘liq. “Real” fransuz futbolchisi uchun kurashda asosiy favorit ekani aytilmoqda, ammo “Liverpul” ham Kilianni qo‘lga kiritishga umid qilmoqda. Shuningdek, PSJ Messi va Neymarni yo‘qotgach, o‘zining asosiy yulduzini saqlab qolish uchun bor kuchini sarflaydi.