Мбаппе Олимпиадада қатнашмоқчи

ПСЖ ҳужумчиси Килиан Мбаппе ёзда бўлиб ўтадиган Париж Олимпиадасида Франция олимпия терма жамоаси сафида ўйнамоқчи. Бу ҳақда 2024 йилги Олимпиада ўйинлари ташкилий қўмитаси президенти Тони Эстанге маълум қилди.

Франция терма жамоаси бош мураббийи Дидье Дешам Мбаппенинг Олимпиадада Тьерри Анри бошчилигидаги олимпия терма жамоасида ўйнашида муаммо кўрмаётганини айтди. 

“Агар унинг Олимпиадада иштирок этиш истаги бўлса ва бунинг имконияти бўлса, унда муаммо йўқ. Очиғи, барчамизнинг истагимиз бир –Тьерри Анри турнирда рақобатбардош жамоа билан қатнашишини таъминлаш”, дейди Дешам.

Қайд этиш жоиз, Олимпиадада 23 ёшгача бўлган футболчилар иштирок этиши мумкин ва жамоалар таркибга 23 ёшдан катта 3 нафар футболчи киритилишига рухсат берилади.

Мбаппени Олимпиадада қатнашиш-қатнашмаслиги унинг ёзда ПСЖ билан шартномасини янгилашига ҳам боғлиқ. “Реал” француз футболчиси учун курашда асосий фаворит экани айтилмоқда, аммо “Ливерпуль” ҳам Килианни қўлга киритишга умид қилмоқда. Шунингдек, ПСЖ Месси ва Неймарни йўқотгач, ўзининг асосий юлдузини сақлаб қолиш учун бор кучини сарфлайди.