Mbappe Fransiya Olimpiya terma jamoasi qaydnomasiga kiritilmadi

Hujumchi Kilian Mbappe futbol bo‘yicha 2024 yilda Parijda bo‘lib o‘tadigan Olimpiada o‘yinlari uchun Fransiya terma jamoasining dastlabki tarkibiga kiritilmadi. Bu haqda terma jamoa matbuot xizmati xabar berdi.

Ma’lum bo‘lishicha, Fransiya Prezidenti Emmanuel Makron hujumchining Olimpiadadagi ishtiroki masalasini Madridning “Real” klubi prezidenti Florentino Peres bilan muhokama qilishni rejalashtirmoqda. Fransiyalik futbolchining o‘zi esa Olimpiadada qatnashish istagini bildirdi.

Ma’lumot uchun, Mbappe 25 yoshda va 2018 yildan buyon PSJda o‘ynadi. Jamoa tarkibida futbolchi besh karra Fransiya chempioni, uch karra mamlakat kubogi va superkubogi sohibi bo‘ldi, ikki marta Liga kubogini qo‘lga kiritdi. Milliy terma jamoa tarkibida Mbappe 2018 yil Rossiyada bo‘lib o‘tgan Jahon chempionatida g‘olib chiqdi va 2022 yil Qatarda bo‘lib o‘tgan mundial kumush medalini qo‘lga kiritdi va sakkizta gol urib, turnirning eng yaxshi to‘purariga aylandi. 2021 yilda forvard Fransiya terma jamoasi bilan birgalikda Millatlar ligasida g‘olib chiqdi.

2024 yilgi Yozgi Olimpiada o‘yinlaridagi futbol musobaqalari 24 iyuldan 10 avgustga qadar Parij va Fransiyaning boshqa olti shahrida bo‘lib o‘tadi. Parijdan tashqari musobaqalar Bordo, Marsel, Lion, Nant, Nitssa va Sent-Etenda o‘tkaziladi.