Masjiddagi gaz portlashi ortidan hukumat komissiyasi tuzildi

Bugun, 31 mart kuni tushdan keyin Andijon viloyatidagi “Ahmadali hoji” jome masjidida sodir bo‘lgan gaz portlashi ortidan hukumat komissiyasi tuzildi. Bu haqda Bosh vazir matbuot kotibi Bekzod Hidoyatov ma’lum qildi.

Bildirilishicha, masjid hududida ro‘y bergan baxtsiz hodisa oqibatida halok bo‘lgan fuqarolarning oila a’zolariga har tomonlama ko‘maklashish hamda jabrlangan fuqarolarga tez tibbiy yordam ko‘rsatish, ushbu baxtsiz hodisaning kelib chiqish sabablarini o‘rganish, shuningdek, bu kabi favqulodda vaziyatlarning oldini olish maqsadida Vazirlar Mahkamasining tegishli farmoyishi qabul qilingan.

Farmoyish bilan Bosh vazir o‘rinbosari Ochilboy Ramatov boshchiligida hukumat komissiyasi tuzilgan.

Dastlabki ma’lumotlarga ko‘ra, talafot oqibatida 3 nafar fuqaro halok bo‘lgan, 10 nafar fuqaro tan jarohati olib, shifoxonaga yuborilgan.

Eslatib o‘tamiz, oldinroq hodisa sodir bo‘lgani xabar qilinganida vodiyda bo‘lib turgan Bosh vazir o‘rinbosari Ochilboy Ramatov hamda Favqulodda vaziyatlar vaziri general-mayor Botir Qudratxo‘jayev Izboskan tumaniga yetib borgandi. Keyinroq O‘zbekiston musulmonlari idorasi raisi, muftiy Shayx Nuriddin Xoliqnazar ham voqea joyiga jo‘nab ketdi. Hozirda mazkur holat yuzasidan dastlabki tergovoldi surishtiruv ishlari olib borilmoqda.