Makron Ukrainaga qo‘shimcha 2 milliard yevro harbiy yordam ajratadi (video)

Kecha, 26 mart kuni kechqurun Fransiya Prezidenti Emmanuel Makron Parijda Ukraina Prezidenti Vladimir Zelenskiyni qabul qildi. Bu haqda Zelenskiy o‘zining Telegram-kanalida xabar berdi.

Qayd etilishicha, tomonlar “ko‘ngillilar koalitsiyasi” sammitiga tayyorgarlik ko‘rish uchun uchrashgan. Bu koalitsiya Ukrainaga uzoq muddatli xavfsizlik kafolatlarini berishga tayyor davlatlardan iborat. Ushbu uchrashuv doirasida Makron Ukrainaga yana 2 milliard yevro miqdorida harbiy yordam ajratishini ma’lum qildi. Yangi harbiy yordam paketi quyidagilarni o‘z ichiga oladi:

• Milan tankka qarshi raketalari
• Mirage qiruvchilari uchun MICA raketalari
• Mistral zenit raketalari 
• Bronetexnika
• O‘q-dorilar
• Dronlar

Makron bilan birga so‘zga chiqqan Ukraina Prezidenti Vladimir Zelenskiy AQSHning o‘t ochishni to‘xtatish masalasidagi ishtirokiga umid bildirdi.

“Biz Saudiya Arabistonida AQSH bilan bir necha bor muzokaralar o‘tkazdik, natijada zaruriy yordam va razvedka ma’lumotlarini oldik. Amerika bizga qisman o‘t ochishni to‘xtatish imkoniyatini ta’minlay oladi, deb umid qilamiz va bunga ishonamiz”, deydi u.

Makron bugun, 27 mart kuni Parijda dunyo yetakchilari bilan bo‘ladigan sammitda “Ukraina qurolli kuchlarining kelajakdagi formati” muhokama qilinishiga urg‘u berdi. Ushbu muzokaralarning maqsadi – Ukrainaga yangi hujumlarga qarshi turish va uzoq muddatli xavfsizlikni ta’minlash imkoniyatini yaratish.

Eslatib o‘tamiz, avvalroq AQSH va Rossiya delegatsiyalarining Ar-Riyoddagi muzokaralari chog‘ida Qora dengizda xavfsiz yuk tashishni ta’minlash bo‘yicha kelishuvga erishilgan. Tomonlar Qora dengizda kuch ishlatishni istisno qilish va tijorat kemalaridan harbiy maqsadlarda foydalanishni oldini olish zarurligiga kelishib olgandi.