Makron Rossiyani keskin ogohlantirdi

Fransiya Prezidenti Emmanuel Makron Rossiyaning Yevropa va Fransiyaga qarshi gibrid hujumlar kampaniyasini kuchaytirayotganini aytib, bunga javob qaytarilishini va’da qildi. Bu haqda u kecha, 18 sentyabr kuni Parijda xalqaro vaziyat va uning oqibatlariga bag‘ishlangan uchrashuvdan so‘ng o‘tkazilgan matbuot anjumanida so‘z ochdi.

“So‘nggi haftalarda yevropaliklar va Fransiyaga, ayniqsa Rossiya tomonidan yuzaga kelayotgan gibrid tahdid kuchaydi”, degan Makron.

Uning aytishicha, Moskva Yevropani qo‘rqitish va qit’aning Rossiya bilan urushda Ukrainani qo‘llab-quvvatlash borasidagi qat’iyatini susaytirishga urinmoqda.

“Buning natijasi aksincha bo‘ladi. Biz qo‘rqmaymiz, chunki bugun ham, ertaga ham xavfsizligimiz Ukrainada hal qilinayotganini bilamiz”, degan Fransiya Prezidenti.

Shuningdek, Makron Rossiyaning tajovuzkor harakatlari o‘zgarib borayotganiga misol sifatida avgust oyida Leypsig aeroportida sodir bo‘lgan dron hujumiga urinishni keltirgan. Germaniya hukumati mazkur hodisa ortida Moskva turganini bildirgan.

Rossiya esa Yevropa davlatlarining gibrid hujumlar haqidagi ayblovlarini asossiz deb hisoblaydi. Moskva bunday bayonotlarni Rossiyaga qarshi kayfiyatning kuchayishi bilan izohlamoqda.

Makron matbuot anjumanida Fransiyadagi yuqori yonilg‘i narxlari masalasiga ham to‘xtalgan. Yonilg‘i narxlarining oshishi hukumatga qo‘shimcha bosim o‘tkazmoqda. Hukumat kelasi yil uchun byudjet taqchilligini kamaytirishga qaratilgan rejani yakunlashga urinayotgan bir paytda mamlakat aholisi turmush xarajatlari oshishidan norozilik bildirmoqda.

Fransiyaning yuqori byudjet taqchilligi hukumatning yonilg‘i xarajatlarini qoplashga yordam berish imkoniyatlarini ham cheklamoqda. Makron yonilg‘i narxlarining oshishiga Fransiya tanlamagan va unda ishtirok etmayotgan Yaqin Sharqdagi urush sabab bo‘layotganini aytgan.

Makronning ma’lum qilishicha, yaqin haftalarda “Katta yettilik” (G7) davlatlari yig‘ilishi o‘tkaziladi. Unda a’zo davlatlar o‘rtasidagi hamkorlikni kuchaytirish hamda davom etayotgan energetika inqirozi sharoitida ta’minotni barqarorlashtirish masalalari muhokama qilinadi.

Eslatib o‘tamiz, avvalroq Rossiya Prezidenti Vladimir Putin Yevropa qo‘shinlarining Ukrainaga kiritilishi Rossiya bilan urushga olib kelishini aytib, Yevropa davlatlarini keskin ogohlantirgandi.