Maxachevning keyingi raqibi Oliveyra emas – Abdul-Aziz

Yengil vazn toifasida UFC chempioni Islom Maxachevning menejeri Ali Abdul-Aziz mijozining keyingi raqibi kim bo‘lishini aytdi. Bu haqda u o‘zning ijtimoiy tarmoqlardagi sahifalarida ma’lum qildi.

Menejerning so‘zlariga ko‘ra, dog‘istonlik chempionning navbatdagi raqibi Charlz Oliveyra emas, balki Arman Sarukyan yoki Iliya Topuriya bo‘lish ehtimoli katta.

“Islomning rejasi boshqacha. U promoushen rahbariyati rejalashtirayotganidek, Oliveyra bilan emas, balki Arman Sarukyan yoki Iliya Topuriya bilan jang qilmoqchi. Chunki endi Islomga Charlz bilan jang qiziq emas. Ammo oldindan biror narsa deb bo‘lmaydi. Vaziyat kutilmaganda o‘zgarishi mumkin”, deydi Abdul-Aziz.

Eslatib o‘tamiz, kecha, 19 yanvar kuni AQSHning Los-Anjeles shahrida yilning ilk raqamli turniri UFC 311 bo‘lib o‘tdi. Kechaning markaziy jangida yengil vazn toifasi chempioni Islom Maxachev da’vogar Renato Moykanoni birinchi raunddayoq bo‘g‘ish uslubi orqali mag‘lub etdi.