Maxachev uchun eng kuchli raqibman – Dariush PR’ni boshladi

UFC yengil vazn toifasi jangchisi eronlik Beneil Dariush (21-4-1) rossiyalik Islam Maxachev (21-1-0) bilan jang haqida fikr bildirdi va Habib Nurmuhamedovning jamoadoshi g‘alaba qozongan taqdirda qo‘shimcha bonus to‘lanishi haqidagi so‘zlariga javob qaytardi.

“Islam mahoratli va ko‘p qirrali jangchi, lekin men ham u ijro etayotgan harakatlarni qila olaman. Hatto, undan-da yaxshiroq. Fevral oyida ko‘plab odamlarning qarashlarini butkul o‘zgartiraman. Maxachev va men juda o‘xshashmiz va chapaqaymiz. Biz yaxshi jangchilarmiz va “stoyka”da qanday ishlashni bilamiz. U ajoyib kurashchi, fintlardan, turli burchaklardagi zarbalardan foydalanadi. Lekin men uning uchun eng kuchli raqibman, chunki bularning barchasini men ham qila olaman”, deydi Dariush.

Shuningdek, 32 yoshli eronlik jangchi sobiq chempion va Maxachevning jamoadoshi Habibning gaplariga javob qaytardi:

“G‘alaba uchun Maxachevga ikki barobar bonus? Bu meni kuldirdi. Habib bu haqda gapirib, shouga drama qo‘shishga qaror qildi. Men hatto Ali Abdelazizga qo‘ng‘iroq qildim va hazillashib, “burgut”ni menejer qilib olmoqchi ekanligimni aytdim. Gap shundaki, bu jang shartnomasining standart bandi va menda ham bor. Shartnomamda ikki barobar bonus bor va bu har doim ham men kurashayotgan raqib nomiga bog‘liq emas. Ammo Habibning qilayotgan ishlarini qadrlayman – u bizning jangimizni ommalashtirmoqda”.

Eslatib o‘tamiz, Dariush va Maxachev o‘rtasidagi jang 2022 yilning 27 fevral kuni “UFC Fight night 203” turniri doirasida bo‘lib o‘tishi rejalashtirilgan.

Ma’lumot uchun, ushbu turnirda o‘zbekistonlik yarim o‘rta vazn toifasi jangchisi Mahmud Murodov (25-6) UFC’dagi 5-jangini Litva vakili Mixail Sirkunovga qarshi o‘tkazadi.