Los-Anjelesda Falastinni qo‘llab yana yuzlab odam ko‘chaga chiqdi

Amerikaning Kaliforniya shtati janubidagi Los-Anjeles shahrining yuzlab aholisi 23 dekabr oqshomida Falastinni qo‘llab norozilik namoyishiga chiqdi. Bu haqda CNN xabar berdi.

Qo‘shma Shtatlarda Falastin-Isroil mojarosining yangi bosqichidan so‘ng keng ko‘lamli norozilik namoyishlari bo‘lib o‘tmoqda, ularning aksari G‘azo sektoridagi o‘t ochishni to‘xtatishga qaratilgan.

Xabar qilinishicha, namoyishchilar mashhur Beverli-Center savdo markazi tomon borib, transport vositalari yo‘lini to‘sib qo‘ygan. Mahalliy politsiya bo‘limining o‘nlab avtomobillari va mototsikllari esa jamoat tartibini saqlashga harakat qilgan. Oxir-oqibat, namoyish noqonuniy deb topilib, uning ishtirokchilaridan tarqalish talab qilingan.

“Guruhga mitingni to‘xtatish buyrug‘i berildi va u tinch yo‘l bilan amalga oshdi”, deyilgan Los-Anjeles politsiyasi bayonoti.

Shuningdek, o‘tgan hafta boshida Amerika poytaxti Vashingtondagi Kapitoliyda G‘azo sektoridagi o‘t ochishni to‘xtatish talab qilingan miting bo‘lib o‘tgan. “Axios” portali Kapitoliy politsiyasiga tayanib, 60 ga yaqin namoyishchi hibsga olingani haqida xabar berdi.

Eslatib o‘tamiz, noyabr oyi boshida AQSHda hukumatning Isroilni qo‘llayotganiga qarshi namoyishlar boshlangan edi.