London va Parij Ukrainaga “tinchlikparvar kuchlar” yuborishni muhokama qilmoqda – OAV

Buyuk Britaniya va Fransiya Bosh vazirlari Kir Starmer va Emmanyuel Makron Ukrainadagi urushni tugatish bo‘yicha kelishuvga erishilgan taqdirda Ukrainaga tinchlikparvar kontingent sifatida britaniyalik va fransuz askarlarini yuborish imkoniyatini muhokama qilmoqda. Bu haqda Londonning “The Telegraph” gazetasi kecha, 15 yanvar kuni manbalarga tayanib xabar berdi.

Nashr suhbatdoshlarining so‘zlariga ko‘ra, Makron bu g‘oyani faol targ‘ib qilmoqda va uni Ukraina Prezidenti Vladimir Zelenskiy va Polsha Bosh vaziri Donald Tusk bilan muhokama qilgan. Dauning-strit va Yelisey saroyi matbuot xizmatlari Starmer va Makron o‘tgan hafta Britaniya Bosh vazirining Chekersdagi qarorgohida bo‘lib o‘tgan uchrashuvda bu masalani muhokama qilgani haqidagi xabarlarni inkor etmadi.

Muzokaralar tafsilotlari maxfiyligicha qolmoqda, biroq Britaniya hukumatidagi bir qancha yuqori martabali manbalar Starmer bu rejaga hali to‘liq sodiq emasligini aytmoqda.

Buyuk Britaniya hukumati ochiqchasiga G‘arb ittifoqchilari Zelenskiyni maksimal darajada qo‘llab-quvvatlashi kerak, degan pozitsiyani egallab, Ukrainaga tinchlik muzokaralarini qachon va qanday sharoitda boshlashni hal qilish imkonini beradi. Shu bilan birga, vazirlar va rasmiylar AQSHning saylangan prezidenti Donald Trampdan Ukraina va Rossiya o‘rtasida muzokaralar o‘tkazishga undashini kutmoqda va ehtimoliy ssenariylarni hisoblash harakatlari davom etmoqda.

Muhokama qilinayotgan fikrlardan biri shundaki, G‘arb qo‘shinlari tinchlik bitimi shartlarini bajarishi mumkin. Rossiya urush paytida bosib olingan hududlarning bir qismini saqlab qolishi varianti ham ko‘rib chiqilmoqda, biroq bu masala bo‘yicha katta noaniqlik saqlanib qolmoqda.

Agar shunday ssenariy amalga oshsa, Yevropa yetakchilari Ukrainaning qolgan hududini Rossiyaning kelajakdagi hujumlaridan himoya qilish choralarini muhokama qilmoqda. Makron Yevropa ittifoqchilariga joylarda kuzatuvchi rolini o‘ynashni taklif qilmoqda. Bu fikr jamoatchilik muhokamasida ham, yopiq eshiklar ortida ham muhokama qilinadi.

Ukraina va Rossiya hududlari o‘rtasidagi chegarada G‘arb qo‘shinlari tomonidan qo‘riqlanadigan demilitarizatsiyalangan bufer zonani yaratish ham variant sifatida muhokama mavzusi bo‘lmoqda.

Eslatib o‘tamiz, avvalroq Fransiya o‘z qo‘shinlarining Ukrainaga kirishi mumkinligi uchun yashirin harbiy mashg‘ulotlar o‘tkazgani xabar qilingandi. “Perseus” mashqlari 2024 yil kuzida Fransiyadagi poligonda 10 kun davom etdi va armiya maxsus kuchlarining (CAST) 3200 ga yaqin askarini jalb qildi. Mashqlar davomida ular Rossiya qo‘shinlarining Ukraina hududiga bo‘lishi mumkin bo‘lgan zarbasini Belarus hududidan qaytarishni mashq qilgan. https://qalampir.uz/n/112823 Buyuk Britaniyaning sobiq mudofaa vazirlari Grant Shepps va Gevin Uilyamson esa mamlakatning “The Telegraph” nashriga bergan intervyusida harbiy harakatlar tugaganidan keyin qirollik Ukrainaga “tinchlikparvar qo‘shinlari”ni yuborishi kerakligini aytgandi.