“Liverpul” Saloh bilan hamkorlikni uzaytirishga yaqin turibdi

“Liverpul”ning misrlik hujumchisi Muhammad Saloh “mersisaydliklar” klubi bilan yangi shartnoma imzolashga yaqin turibdi. Yangi shartnoma yana 12 oyga uzaytirish imkoniyati bilan 2027 yilgacha amal qiladi. Bu haqda taniqli futbol jurnalisti Nikolo Skira X sahifasida ma’lum qildi.

Saloh “Liverpul”da 2017 yilning yozidan buyon o‘ynamoqda. Ingliz klubi tarkibida misrlik futbolchi Angliya Premer-ligasi, ichki kuboklar, Yevropa Chempionlar ligasi va FIFA klublar o‘rtasidagi jahon chempionatida g‘olib chiqdi.

Qayd etish joiz, Saloh Angliya Premer-ligasi tarixida ketma-ket to‘rt mavsum 10 va o‘ntadan ortiq gol urgan va golli uzatmani amalga oshirgan birinchi futbolchi hisoblanadi. Shuningdek, hujumchi chempionatda Rojdestvo bayrami oldidan gol+pas tizimida 15+10 natija qayd etishga muvaffaq bo‘lgan birinchi futbolchi sanaladi.

Umumiy hisobda joriy mavsum forvard klub safida barcha turnirlar doirasida 24 ta o‘yin o‘tkazib, 18 ta gol urdi va 15 ta golli uzatmani amalga oshirdi.