Kurtua “Man Siti”ga qarshi jarohat bilan o‘ynagani ma’lum bo‘ldi

Madridning “Real” klubi darvozaboni Tibo Kurtua Yevropa Chempionlar ligasi 1/2 finalida “Manchester Siti”ga qarshi javob o‘yinda (0:4) jarohat bilan harakatlangan. Bu haqda “Marca” xabar berdi.

Manbaga ko‘ra, Ispaniya chempionati doirasidagi o‘tgan dam olish kuni bo‘lib o‘tgan “Xetafe” bilan o‘yinda Kurtuaning qo‘l suyaklarida yorilish paydo bo‘lgan. Shunga qaramay, u Yevropa Chempionlar ligasi yarim finalining “Manchester Siti”ga qarshi javob uchrashuvida asosiy tarkibda maydonga tushdi. Kurtua “shaharliklar”ga qarshi o‘yinda to‘rtta gol o‘tkazib yubordi.

“Real” va “Manchester Siti” jamoalarining birinchi o‘yini 1:1 hisobida yakunlangandi. Ikkinchisi 4:0 hisobida ingliz jamoasi foydasiga hal bo‘ldi. Shu tariqa, “Manchester Siti” 2022/2023 yilgi mavsumda YeCHL finaliga chiqdi va Gvardiola shogirdlari finalda “Inter” bilan to‘qnash keladi. Turnirning hal qiluvchi o‘yini 10 iyun kuni Istanbulda bo‘lib o‘tadi.