Kuldirib yurib, yig‘latib ketgan “Mittivine”

“Mittivine” taxallusi bilan tanilgan, Instagram’da 1,1 million obunachisi bo‘lgan bloger Farhod Mannopov 5 martga o‘tar kechasi vafot etdi. Bu haqda ijtimoiy tarmoqlarda uning do‘stlari ma’lum qildi. Mannopov 27 yoshda edi, u oilaning yolg‘iz o‘g‘il farzandi bo‘lgan.

Ma’lumotlarga ko‘ra, u bir necha kun avval basseynda boshi va burnidan jarohat olgan. Shundan so‘ng, ushbu jarohat ustidan operatsiya o‘tkazilgan. Operatsiyadan keyin u koma holatidan chiqa olmagan.

Marhumning dafn marosimi kecha, 5-mart kuni Asr namozi vaqtida bo‘lib o‘tdi. Janozada 10 mingdan ortiq odam qatnashgani aytilmoqda.

Bugun, 6 mart kuni Bosh Prokuratura Bloger Farhod Mannopovning o‘limi yuzasidan Jinoyat ishi qo‘zg‘atilganini ma’lum qildi.

“Holatga aloqador shaxslarni batafsil so‘roq qilish, ko‘p vaqt talab qilinadigan murakkab ekspertizalar tayinlash va boshqa bir qator tergov harakatlarini o‘tkazmasdan qonuniy to‘xtamga kelish imkoni yo‘qligi sababli Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) 4-qismi “a” bandi bilan jinoyat ishi qo‘zg‘atildi”, deydi Bosh prokuratura matbuot kotibi.

Qayd etilishicha, tergov o‘tkazish yo‘li bilan qonuniy qaror qabul qilinishi ta’minlanadi.

Farhod Mannopov Toshkentdagi xususiy klinikalardan birida operatsiya qilingan.

Malakali shifokor mutahassislarning ma’lum qilishicha, boshi va burnidan og‘ir shikastlangan bemorlarning jarohatlari bitib, tahlil natijalari ijobiy ko‘rsatkich berguncha operatsiya qilish mumkin emas. Farhod Mannopov basseynda orttirgan tan jarohatidan ko‘p o‘tmay operatsiya qilingan. Ko‘plab ma’lumotlarga ko‘ra, u to‘liq tahlildan o‘tkazilmagan bo‘lishi mumkin.

Ayrimlarning aytishicha, Farhod Mannopov 36 soat ya’ni 1,5 sutka davomida koma holatida bo‘lgan. Uning komaga tushishishi ko‘p miqdorda narkoz berilgani bilan bog‘lanyapti. Hozircha bu haqda rasmiy ma’lumotlar mavjud emas.

QALAMPIR.UZ jamoasi marhumning yaqinlariga chuqur hamdardlik bildiradi.