Krishtianu Ronaldu “Real”ga qaytishga qaror qildi

Turinning “Yuventus” klubi hujumchisi portugaliyalik Krishtianu Ronaldu sobiq jamoasi Madridning “Real” klubiga qaytishni istamoqda, deya xabar tarqatdi “Calciomercato”.

Manbaning xabariga ko‘ra, Ronaldu “Yuventus”dagi hozirgi holatdan ko‘ngli to‘lmayapti. Koronavirus pandemiyasi sabab klub rahbariyati futbolchilarning maoshini ushlab qolgani bunga sabab bo‘lmoqda. Shuning uchun ham Krishtianu Ronaldu “Real”ga qaytish variantini ko‘rib chiqish niyatida.

Ma’lumot o‘rnida, Ronaldu 2018 yili yoz oyida “Real Madrid” klubidan “Yuventus”ga 117 million yevro evaziga ko‘chib o‘tgan. U joriy mavsumda turinliklar libosida barcha musobaqalarda 32 uchrashuvda maydonga tushgan va raqiblar darvozasini 25 marotaba ishg‘ol qilgan. Ronalduning “Yuventus” bilan tuzgan amaldagi shartnomasi 2022 yilda o‘z nihoyasiga yetadi.

Eslatib o‘tamiz, ayni damda koronavirus yuqtirib olgan insonlar soni 1 274 589 nafarni tashkil etyapti. 69 488 odam ushbu kasallik qurboni bo‘ldi. 264 840 nafar inson koronavirusdan butkul sog‘ayib ketgan.