Kreml Navalniyning “Putin uchun saroy” filmiga munosabat bildirdi

Avvalroq, Korrupsiyaga qarshi kurash fondi asoschisi hamda muxolifat yetakchisi Navalniyning YouTube platformasida “Putin uchun saroy” nomli surishtiruv filmi e’lon qilingani haqida xabar bergan edik. Filmda Gelenjik yaqinida, Qora dengiz sohilida joylashgan, umumiy 17 691 metr kvadrat maydonni egallagan saroy Putin nomi bilan bog‘langan. 

Rossiya Federatsiyasi Prezidentining Matbuot kotibi Dmitriy Peskov Aleksey Navalniyning surishtiruv filmini hali ko‘rmaganini ta’kidladi. Shuningdek, Peskov Prezident Putinda bunday ko‘chmas mulk yo‘qligini qo‘shimcha qildi. Bu haqda “Daily Storm” xabar bermoqda.

“Surishtiruvga ko‘zim tushmadi, lekin aytishim mumkinki, eski kaseta yana aylanyapti. Ko‘p yillar oldin ham biz Putinning Gelenjikda hech qanday ko‘chmas mulki yo‘qligini tushuntirgan edik”, deydi Dmitriy Peskov.

Ma’lumot o‘rnida, Aleksey Navalniy 2017 yilda Rossiya Prezidenti Matbuot kotibi Dmitriy Peskov nomi bilan bog‘liq “Peskovning o‘g‘li: Angliya zindonidan Rossiya elitasigacha” nomli surishtiruv filmini e’lon qilgan.  

Eslatib o‘tamiz, Rossiya muxolifati yetakchisi Aleksey Navalniy zaharlanish tashxisi bilan Germaniyada uzoq muddat davolanib, joriy yilning 17 yanvar kuni Rossiyaga qaytdi va o‘sha vaqtning o‘zidayok aeroportda hibsga olindi. U ayni vaqtda panjara ortida.