Kimlar AQSH vizasini suhbatsiz olishi mumkin?

AQSHning immigratsiya qonunchiligiga muvofiq, ayrim noimmigratsion vizaga murojaat etuvchilar suhbatdan o‘tmay turib, vizasini yangilashi mumkin. Bu haqda AQSHning O‘zbekistondagi elchixonasi xabar berdi.  

Unga ko‘ra, bunday imkoniyatga ega bo‘lish uchun murojaatchilar fuqaroligidan qat’iy nazar, hali ham yaroqli yoxud muddati tugaganiga 48 oydan oshmagan vizasi bilan xuddi shu turdagi viza olishga murojaat qilishi mumkin.

Ammo quyidagi shaxslar ushbu talablarga javob bermaydi:

• Qayerda yashashidan qat’iy nazar, avvalgi vizalari O‘zbekiston hududidan tashqarida berilgan bo‘lsa;
• Oxirgi viza murojaat bo‘yicha rad javobi olingan bo‘lsa;
• Murojaatchining hozirdagi yoki oldin olgan vizalarida “clearance received" annotatsiyasi qayd etilgan bo‘lsa;
• “Yozgi ta’tildagi ish va sayohat” (Summer Work and Travel) dasturi ishtirokchilari;
• Agar F, M, va J viza turlari bo‘yicha viza olgan murojaatchilarning SEVIS'i, o‘quv dasturi va o‘qish joyi o‘zgargan bo‘lsa;
• Oxirgi safar viza olganidan so‘ng murojaatchi 14 yoshga to‘lgan bo‘lsa.

“Shuni ta’kidlab o‘tamizki, AQSH immigratsion qonunchiligiga asosan, konsul har qanday murojaatchini suhbatga chaqirish huquqiga ega”, deya qo‘shimcha qilgan elchixona.

Barcha talablarga javob beruvchi shaxslar elektron anketa to‘ldirishi va anketasining tasdiqlangan sahifasi, avvalgi AQSH vizasining nusxasi va hozirgi pasportining nusxasini biriktirib, elektron pochta orqali yuborishi kerak. Shundan so‘ng, AQSH elchixonasi elektron manzil orqali murojaatchining hujjatlar topshirish uchun tashrif buyuradigan sanasini ma’lum qiladi.

Ma’lumot uchun, safarga birga ketayotgan oiladan faqat bir kishi onlayn ro‘yxatga yozilishi lozim.  Ro‘yxatga yozilgan oila a’zosi barcha talab etiladigan hujjatlarni AQSH elchixonasiga borib topshirishi kerak.

Eslatib o‘tamiz, Amerika Qo‘shma Shtatlarining O‘zbekistondagi elchixonasi DV-2025 (Diversity Visa – Green Card) dasturiga murojaat etish bo‘yicha 10 ta muhim maslahat bergandi.