Xorazmda bozor yondi (video)

Xorazm viloyatidagi bozorlardan biri yonib ketdi. Bu haqda viloyat Favqulodda vaziyatlar boshqarmasi xabar berdi.

Aniqlanishicha, yong‘in bugun, 18 iyun kuni soat tungi 02:30 da viloyatning Hazorasp tumani “Bog‘dor” MFY hududida joylashgan “Hazorasp universal savdo kompleksi” AJ hududida sodir bo‘lgan hamda FVBga bu haqda xabar kelib tushgan. 

Xabarga asosan yong‘in-qutqaruvchilar soat 02:35 da voqea joyiga yetib borib, yong‘in soat 04:04 da to‘liq bartaraf qilingan. Yong‘in-qutqaruvchilarning sa’y-harakatlari natijasida yong‘in maydonini boshqa do‘konlarga o‘tib, kengayishi oldi olingan va savdo kompleksi hududining 4200 kv metr maydoni saqlab qolingan. Yong‘in oqibatida 300 kv metr maydonda joylashgan aralash turdagi mollar savdo do‘konlari yonib zararlangan. 

Bildirilishicha, hozirda yong‘inning yuzaga kelish sababi hamda moddiy zarar miqdori aniqlanmoqda. Yong‘in oqibatida tan jarohati olganlar va halok bo‘lganlar yo‘q.

Eslatib o‘tamiz, avvalroq Andijonda g‘alla maydoni yonib ketgani haqida xabar berilgandi.