Xitoyda 82,8 mlrd dollarlik oltin konlari topildi

Xitoy geologlari mamlakatning Xunan provinsiyasida yirik oltin konlarini aniqladi. Bu haqda “Sinxua” xabar berdi.

Dastlabki hisob-kitoblarga ko‘ra, 40 ta tomirda topilgan oltin zaxiralarining qiymati 82,8 milliard dollarni tashkil etadi.

“Ko‘p yillik mashaqqatli mehnatdan so‘ng Xunan instituti yer ostidan 2000 metrdan ortiq qatlamlarda 40 dan ortiq oltin tomirlarini topgan. Konda oltin miqdori 138 grammgacha bo‘lgan jinslar aniqlanib, asosiy qidiruv hududida jami 300,2 tonna oltin zaxirasi topilgan.

Mutaxassislarning ta’kidlashicha, yer ostida 3000 metrdan ortiq chuqurlikda, prognozlarga ko‘ra, 1000 tonnadan ortiq oltin bor bo‘lishi mumkin.

Natijalarni olishdan oldin geologlar Xunanda turli joylarda burg‘ilash ishlarini olib borgan, quduqlarning umumiy chuqurligi 150 km edi. Ular uch o‘lchovli geologik modellashtirish, boshqariladigan tovush manbai yordamida elektromagnit tog‘ jinslarini aniqlash va boshqa texnologiyalardan foydalangan.

Xitoy dunyodagi eng yirik oltin ishlab chiqaruvchi hisoblanadi. Asosiy konlar Shandun, Xunan va Yunnan provinsiyalarida jamlangan. Ishlab chiqarish davlat va xususiy kompaniyalar tomonidan qo‘llab-quvvatlanmoqda, qayta ishlash texnologiyalari faol rivojlanmoqda.

Butunjahon oltin kengashi ma’lumotlariga ko‘ra, Xitoy oltin taqinchoqlarni sotish bo‘yicha yetakchiga aylandi, 2023 yilda mamlakatda sotilgan bunday zargarlik buyumlarining umumiy og‘irligi 630 tonnani tashkil etgan va shu yili butun dunyoda ishlab chiqarilgan oltinlarning salkam 10 foizi Xitoy hisobiga to‘g‘ri kelgan.

Eslatib o‘tamiz, avvalroq O‘zbekiston 2023 yil yakunlariga ko‘ra, dunyodagi eng yirik oltin ishlab chiqaruvchilar orasida 10-o‘rinni egallagani xabar qilingandi. 12 oy davomida O‘zbekistonda 119,6 tonna qimmatbaho metall ishlab chiqarilgan. 2023 yilda Rossiya eng yirik oltin ishlab chiqaruvchilar orasida ikkinchi o‘rinni egallagan. Rossiya 321,8 tonna qimmatbaho metall ishlab chiqargan va Xitoydan (378,2 tonna) keyin ikkinchi o‘rinni egallagan. Uchinchi o‘rinda esa 293,8 tonna ko‘rsatkich bilan Avstraliya qayd etilgan.