Kennediga qilingan suiqasd videosi kimoshdi savdosiga qo‘yiladi
Olam
−
05 Sentabr 7464
AQSHning 35-prezidenti Jon Kennedining korteji suiqasddan so‘ng shifoxonaga ketayotgani aks etgan yangi videolavhalar Massachusets shtatining Boston shahridagi RR Auction kimoshdi savdosi uyida sotiladi. Bu haqda “People” nashri xabar berdi.
Nashrga ko‘ra, kimoshdi savdosi 28 sentyabr kuni bo‘lib o‘tadi. Videoda Parklend shifoxonasiga shoshilayotgan kortej tasvirlangan. Uning muallifi Texas shtatining Dallas shahrida yashovchi Deyl Karpenter bo‘lib, uning o‘limidan so‘ng videolavha nabirasi Jeyms Geytsga qolgan.
“Plyonka plastik sut qutisida saqlangan. U bir necha yil mening shkafimda turdi”, deydi Geyts.
RR Auctions ijrochi vitse-prezidenti Bobbi Livingstonga ko‘ra, boshqa barcha videolardan farqli o‘laroq, ushbu lavha “Zapruder filmi”da qayd etilgan voqealardan keyingi lahzani aks ettiradi.
Ma’lumot uchun, Kennedi o‘ldirilishi aks etgan 26 soniyalik video Qo‘shma Shtatlarda “Zapruder filmi” nomi bilan tanilgan, chunki uni kinokamera bilan olomon orasida bo‘lgan Avraam Zapruder suratga olgan. 486 kadrdan iborat ushbu filmda sobiq prezident vafoti tasvirlangan.
AQSHning 35-prezidenti Kennedi 1963 yil 22 noyabrda Texasga saylovoldi safari chog‘ida Dallasda o‘ldirilgan. Jinoyat ortidan tuzilgan rasmiy komissiya bu Li Xarvi Osvaldning ishi degan xulosaga kelgan va hech qanday keng ko‘lamli fitna bo‘lmaganini ma’lum qilgan. Komissiya xulosasiga ko‘ra, o‘q Dallasning markaziy maydonida joylashgan maktab darsliklari omborining oltinchi qavatidan otilgan. U yerdan teleskopik ko‘rinishga ega miltiq va ishlatilgan patronlar topilgan.
Live
Barchasi
