Qozog‘istonda yana bir dron halokatga uchradi

Qozog‘istonning G‘arbiy Qozog‘iston viloyatidagi Janibek tumanida uchuvchisiz samolyotning qoldiqlari topildi. Bu shu kunlarda mintaqada topilgan uchinchi drondir. Bu haqda “Orda.kz” xabar bermoqda.

Mintaqada yana bir noma’lum dron qulagani haqidagi dastlabki dastlabki ma’lumotlar kecha, 24 mart kuni kechqurun paydo bo‘ldi. bugun, 25 mart kuni ertalab G‘arbiy Qozog‘iston viloyati politsiyasi dron topilgani bo‘yicha surishtiruv ishlari olib borilayotganini tasdiqladi.

“G‘arbiy Qozog‘iston viloyati politsiya boshqarmasi vakolatli xizmatlar bilan birgalikda Janibek tumanida uchuvchisiz samolyot bo‘laklariga o‘xshash ashyolar topilganidan keyin tekshirish ishlarini olib bormoqda. Ob’ekt chekka hududda, aholi punktlaridan uzoqda topilgan”, deya izoh berdi G‘arbiy Qozog‘iston viloyati politsiya bo‘limi.

Halokatga uchragan dron kimga tegishli bo‘lishi hozircha noma’lum. Politsiya voqea holatlariga oydinlik kiritmoqda.

Ma’lumot uchun, G‘arbiy Qozog‘iston viloyatining Janibek tumani Rossiya Federatsiyasining Volgograd va Saratov viloyatlari bilan chegaradosh. Saratov viloyatiga yaqinda Ukraina uchuvchisiz samolyotlari tomonidan hujum uyushtirildi, u Engels shahridagi aerodrom hududiga zarba berdi.

Eslatib o‘tamiz, fevral oyida G‘arbiy Qozog‘iston viloyatining Bokeyordin tumanida noma’lum uchar ob’ekt topilgan edi. Oradan bir oy o‘tib Tasqalin tumanida yana bir dron topildi.