Qozog‘istonda Navro‘zni 10 kun nishonlash taklif qilinyapti

Qozog‘istonda sharqona Yangi yil – Navro‘z bayramini alohida dastur asosida 10 kun davomida nishonlash taklif qilinyapti. “Tengrinews.kz”ning xabar berishicha, tegishli loyiha muhokama uchun e’lon qilindi.

Hujjatga ko‘ra, ushbu bayramni 14 martdan 23 martgacha nishonlash taklif etilmoqda:

14 mart — Tabriklar kuni;
15 mart — Tabiat kuni;
16 mart — Ajdodlar xotirasi va duolari kuni;
17 mart — Tarix kuni;
18 mart — Hayrli ishlar kuni;
19 mart — Sport va mahorat kuni;
20 mart — Donolik va bilim kuni;
21 mart — Milliy taomlar kuni;
22 mart — Xalqning ulug‘ kuni;
23 mart — Ehtirom kuni.

“Qozog‘iston Respublikasi Prezidenti Qosim-Jomart To‘qayev “Mustaqillik — eng aziz ne’mat” maqolasida Navro‘z bayramini nishonlash konsepsiyasini ishlab chiqish va bahor bayrami mazmunini boyitishga ko‘rsatma berdi. (…) Navro‘z bayramining asosiy maqsadi — Qozog‘iston zaminida tinchlik va do‘stlikni mustahkamlash, milliy o‘zlikni saqlash, oilaviy qadriyatlarni ommalashtirish, atrof-muhitga oqilona munosabatni shakllantirish”, deyiladi hujjatda.

Konsepsiyaga ko‘ra, bayramning vazifasi qozoq xalqining an’analari va odatlarini qayta jonlantirish, oila institutini mustahkamlashi va birlikni ta’minlashi, atrofi muhitni asrash kerakligini o‘rgatish bo‘ladi.