Qozog‘istonda mashina bekatdagi odamlarni bosib ketdi (video)

Qozog‘istonning Olmaota shahrida Mercedes-Benz rusmli yengil mashina bekatda avtobus kutayotgan odamlar ustiga yurib ketdi. Bu haqda shahar Yo‘l harakati xavfsizligi boshqarmasiga tayanib, “Nur.kz” xabar berdi.

Ma’lum qilinishicha, bugun, 28 avgust kuni soat 12:20 larda Olmaota shahridagi Abilayxon ko‘chasi va Rayimbek shoh ko‘chasi kesishmasida Mercedes-Benz avtobus kutayotgan odamlarni bosib ketgan. Oqibatda 7 kishi turli darajadagi jarohatlar bilan shahardagi tibbiyot muassasasiga yotqizilgan. 

Politsiyaning ma’lum qilishicha, 36 yoshli Mercedes haydovchisi Abilayxon ko‘chasidan chapga burilishda boshqaruvni yo‘qotgan va Rayimbek shoh ko‘chasidagi avtobus bekatiga borib urilgan. 

“Mazkur YTH bilan bog‘liq faktlar IIB xodimlari tomonidan o‘rganilmoqda, holat yuzasidan batafsil ma’lumot beriladi”, deyiladi xabarda.

Eslatib o‘tamiz, Qozog‘istonning Turkiston viloyatida sodir bo‘lgan yo‘l-transport hodisasi oqibatida 4 kishi halok bo‘lgan edi. Shuningdek, Ukrainaning Vinnitsa viloyatida yuk mashinasi va “Jiguli” o‘rtasida sodir bo‘lgan yo‘l-transport hodisasi oqibatida 12 kishi halok bo‘lgan edi.