Qozog‘istonda Qodirovga qo‘yilgan yodgorlik buzib tashlandi 

Checheniston sobiq rahbari Ahmad Qodirovning xotirasiga Qozog‘istondagi qishloqlardan birida o‘rnatilgan yodgorlik buzib tashlandi. Bu haqda “Sargrad” xabar berdi.

Qayd etilishicha, 5 avgustdan 6 avgustga o‘tar kechasi Qarag‘anda viloyatidagi Saran qishlog‘ida Checheniston rahbari Ramzan Qodirovning otasi sharafiga o‘rnatilgan yodgorlik bir guruh noma’lum shaxslar tomonidan buzib tashlangan. Ular dastlab yodgorlikni turli haqoratli yozuvlar bilan bo‘yagan va bosqonlar yordamida qulatgan. 

“Holat yuzasidan Qozog‘iston politsiyasi jinoiy ish qo‘zg‘atgani haqida hech qanday ma’lumot berilmagan. Shuningdek, Checheniston rahbari Ramzan Qodirov ham bu borada hech qanday izoh bildirmagan”, deyiladi xabarda. 

Ma’lumot uchun, mazkur yodgorlik Rossiya qahramoni va Chechenistonning birinchi rahbari Ahmad Qodirov tug‘ilgan va bolaligida yashagan uy o‘rnida 2012 yilda o‘rnatilgan.