Qozog‘istonda 4 kunlik ish haftasi joriy etiladi

Qozog‘istonda 2023 yil 1 iyuldan to‘rt kunlik ish haftasi joriy qilinadi. Bu haqda “NewsMail” xabar berdi.

Qayd etilishicha, ushbu qaror mamlakat Mehnat kodeksiga “Qozog‘iston Respublikasining ayrim qonun hujjatlariga ijtimoiy ta’minot masalalari bo‘yicha o‘zgartish va qo‘shimchalar kiritish to‘g‘risida”gi qonuni bilan kiritilgan.

Mehnat kodeksiga muvofiq, besh kunlik yoki olti kunlik ish haftasi, shu bilan birga, to‘liq bo‘lmagan ish haftasining davomiyligi tomonlarning kelishuvi bilan belgilanishi nazarda tutilgan.

Shuningdek, sanoatning alohida tarmoqlarida turli haftalarda bir vaqtning o‘zida besh kunlik va to‘rt kunlik ish haftasini belgilash zarurati tug‘iladi.

“Tomonlarning kelishuviga ko‘ra, mehnat shartnomasi besh kunlik yoki olti kunlik ish haftasiga almashtirish huquqi bilan to‘rt kunlik ish haftasini belgilash imkonini beradi”, deyiladi xabarda.

Shunga ko‘ra, 84-modda to‘rt kunlik ish jadvali doirasida dam olish kunlari belgilanadi. Besh kunlik, olti kunlik yoki to‘rt kunlik ish haftasida umumiy dam olish kuni yakshanba hisoblanadi. 

Besh kunlik va (yoki) to‘rt kunlik ish haftasi bilan ikkinchi yoki uchinchi dam olish kuni jamoa shartnomasi yoki mehnat qoidalari bilan belgilanadi.

Ishlab chiquvchilarning fikriga ko‘ra, besh kunlik ish jadvali bilan bir hafta ish, to‘rt kunlik ish haftasi bilan ikkinchi hafta kabi ish rejimini qo‘llash mumkin bo‘ladi. 

Ushbu amaliyot allaqachon ofis xodimlariga nisbatan qo‘llanilgan va xalqaro mehnat standartlariga mos kelgan.‌‌

Ma’lumot uchun, 2014 yilda Xalqaro mehnat tashkiloti barcha mamlakatlarda to‘rt kunlik ish haftasini joriy etishni taklif qilgan edi. Hozirda Ispaniya va Islandiyada ushbu ish jadvali sinab ko‘rilmoqda. 

To‘rt kunlik ish haftasi tarafdorlari bunday rejim ishchilarning ishtiyoqini oshirishi va natijada mehnat unumdorligi ortishini ta’kidlamoqda.