Qozog‘iston Rossiya donining O‘zbekistonga reeksportini chekladi

Qozog‘istonda uchinchi davlatlar va Yevroosiyo iqtisodiy ittifoqidan (YeOII) bug‘doy importiga joriy qilingan taqiq Rossiya g‘allasining Xitoy va O‘zbekistonga reeksportini 2024 yil oxirigacha cheklashga olib keldi. Bu haqda Qozog‘iston Bosh vaziri Oljas Bektenov ma’lum qildi.

“Ichki bozorni himoya qilish maqsadida, avvalroq, Qozog‘iston uchinchi davlatlar va YeOIIdan bug‘doy importini taqiqlash haqida qaror qabul qilgan edi. Bu esa Rossiya g‘allasining O‘zbekiston va Xitoyga reeksportini chekladi”, dedi Bektenov.

Bosh vazir, shuningdek, 2024 yilda Qozog‘iston orqali YeOII davlatlarining tranzit yuklari uchun yagona tarif darajasi oshirilganini ma’lum qildi.

“Masalan, Rossiya g‘allasining Qozog‘iston orqali Qirg‘izistonga eksporti uchun tarif ikki baravar oshirildi”, dedi Bosh vazir.

Eslatib o‘tamiz, avgustda Qozog‘iston hukumatining uchinchi davlatlar va YeOIIdan bug‘doy importini taqiqlash to‘g‘risidagi qarori kuchga kirgan edi. Shundan so‘ng 8 oktyabr kuni Rosselxoznadzor Qozog‘iston orqali Rossiyaga sanksiya ostidagi mahsulotlarning noqonuniy olib kirilishi holatlari haqida xavotir bildirgan. 17 oktyabr kuni esa Rosselxoznadzorning o‘zi ham Rossiyaga Qozog‘istondan bug‘doy, yasmiq, pomidor, qalampir va qovun olib kirishni vaqtincha тақиқлаган. 21 oktyabr kuni Rossiya Qozog‘istondan kesilgan gullar va g‘unchalarning ham mamlakatga importini vaqtincha cheklab qo‘ydi. Cheklovlar fonida Rossiya Qozog‘istonni Yevrosiyo iqtisodiy ittifoqi shartnomasidagi tranzit tashuvlari bo‘yicha yagona tariflardan foydalanish tamoyilini buzganlikda aybladi.