Qodirov va Delimxonov tirik (video)

Kecha, 2 iyul oqshomida Checheniston rahbari Ramzan Qodirov o‘zining yaqin hamkori, Rossiya Davlat Dumasi deputati hamda Rosgvardiyaning chechen bo‘linmasi boshlig‘i Adam Delimxonov bilan Instagram'da jonli efirga chiqdi va o‘zining ahvoli yaxshi ekanini bildirdi. 

Kadrlarda Qodirov va Delimxonovning oshxonada choy ichayotgani aks etgan. 

“It hurar, karvon o‘tar. Biz yashayapmiz, sekin yashayapmiz, non chaynayapmiz. Hayot qiziq, umr qisqa bo‘lsa, u yanada qiziq bo‘ladi. Shuning uchun ham biz uzoq yashashni xohlamaymiz. Biz qisqa, ammo munosib yashaymiz”, degan Checheniston rahbari.

Delimxonov esa sana va vaqt ko‘rinib turgan telefon ekranini ko‘rsatgan. Unda 2 iyul soat 20:47 ekanini ko‘rish mumkin. 

“Bundan keyin ham biz belgilangan vazifalarni bajarishda davom etamiz. Va biz barcha shayton va g‘iybatchilarga aytmoqchimiz: Ahmad – kuchdir”, degan deputat.

Video Telegram kanallarida Qodirovning sog‘lig‘ida jiddiy muammolar borligi va Delimxonovning g‘oyib bo‘lgani haqidagi xabarlar tarqalayotgan paytda e’lon qilingan.

Ma’lumot uchun, Delimxonov oxirgi marta 14 iyun kuni omma oldida ko‘rinish bergan. Shu kuni deputat Zaporoje viloyatining Primorsk shahrida otishma paytida halok bo‘lgani haqida xabarlar tarqalgan. “Zvezda” telekanali Davlat Dumasiga tayanib, Delimxonov yaralangan, ammo tirik ekani haqida xabar bergan. Duma Mudofaa qo‘mitasi rahbari Andrey Kartapolov va quyi palata spikeri Vyacheslav Volodin buni rad etib, Delimxonovning “tirik va sog‘-salomat” ekanini aytgan. Ahmad maxsus kuchlari qo‘mondoni Apti Alaudinov Delimxonovning jarohati haqidagi xabarlarni soxta deb atagan va deputat jangovar zonada emas, balki Chechenistonda ekanini aytgan. Shundan so‘ng Qodirov parlament a’zosi bilan surat va videoni e’lon qilib, uning “tirik va sog‘-salomat ekanini, hatto, jarohati ham yo‘qligini” aytgan.

Eslatib o‘tamiz, oldinroq Ramzan Qodirovning ham o‘lim to‘shagida ekani haqida xabarlar tarqalgan edi. Bunga uning Qurbon Hayiti munosabati bilan xalqini tabriklamagani va Vladimir Putinning Shimoliy Kavkaz respublikalari rahbarlari bilan o‘tkazgan konferensiyasida qatnashmagani sabab bo‘lgan edi.