Qirg‘izistondagi Rossiya harbiy bazasi mintaqa uchun muhim – Putin

Qirg‘izistondagi qo‘shma Rossiya harbiy bazasi butun mintaqada barqarorlikka hissa qo‘shadi. Rossiya Prezidenti Vladimir Putin buni Qirg‘iziston rahbari Sadir Japarov bilan uchrashuvda ta’kidladi. 

“Biz xavfsizlik sohasidagi hamkorlikka alohida e’tibor qaratamiz. Respublikada joylashgan qo‘shma Rossiya harbiy bazasi mintaqada barqarorlikni ta’minlashda muhim omil hisoblanadi”, dedi u. 

Putin Rossiya va Qirg‘iziston xalqaro tashkilotlar – Yevroosiyo iqtisodiy ittifoqi, Kollektiv xavfsizlik shartnomasi tashkiloti, Mustaqil Davlatlar Hamdo‘stligi va BMT doirasida muvofiqlashtirilgan pozitsiyalarga ega ekanligini ta’kidladi. 

“Biz Qirg‘izistonning sentyabr oyida boshlangan Shanxay hamkorlik tashkilotiga raislik davrida yaqin hamkorlikka sodiqmiz. Bugun biz butun ko‘p qirrali ikki tomonlama kun tartibini batafsil ko‘rib chiqamiz va keng qamrovli hamkorligimizni yanada chuqurlashtirish bo‘yicha ko‘rsatmalarni belgilab olamiz”, deb xulosa qildi Rossiya Prezidenti. 

Qirg‘izistondagi qo‘shma Rossiya harbiy bazasi Kollektiv tezkor joylashtirish kuchlarining bir qismi bo‘lib, KXSHTga a’zo davlatlar havo hududi xavfsizligini ta’minlashda ishtirok etadi.

Putinga ko‘ra, Moskva va Bishkek vakillari ikkala tomon uchun ham muhim bo‘lgan hujjatlar to‘plamini imzolaydi. 

“Muzokaralarimiz kun tartibi juda keng. Ittifoqchilik va strategik sheriklikni chuqurlashtirish bo‘yicha qo‘shma siyosat bayonoti imzolash uchun tayyorlandi, unda Rossiya-Qirg‘iziston hamkorligini keng ko‘lamli sohalarda yanada mustahkamlashning asosiy maqsadlari bayon etilgan”, deydi davlat rahbari. 

Rossiya Prezidentining so‘zlariga ko‘ra, savdo, iqtisodiy, ta’lim, migratsiya va boshqa sohalardagi muhim hukumatlararo va idoralararo hujjatlar to‘plami imzolanadi.

Vladimir Putin bugun, 26 noyabr kuni Qirg‘iziston poytaxti Bishkekka davlat tashrifi bilan keldi, bu eng yuqori diplomatik tashrifdir. 27 noyabr kuni Kollektiv xavfsizlik shartnomasi tashkiloti davlat rahbarlari kengashining sammiti bo‘lib o‘tadi.