Qirg‘izistonda katta miqdordagi qurol-yarog‘ ombori topildi

Qirg‘izistonning Chuy viloyatida qurol-yarog‘ va o‘q-dorilarning noqonuniy aylanishi to‘xtatilib, yirik ombor aniqlandi va gumonlanuvchi qo‘lga olindi. Bu haqda viloyat Ichki ishlar bosh boshqarmasi matbuot xizmati xabar berdi.

Qayd etilishicha, 2024 yilning 28 dekabr kuni Ichki ishlar bosh boshqarmasiga Chuy viloyati va Bishkekdagi noqonuniy qurol-yarog‘ savdosi haqida tezkor ma’lumot kelib tushgan. Mazkur holat yuzasidan Qirg‘iziston Jinoyat kodeksining 267-moddasi (qurol va o‘q-dorilarning noqonuniy aylanmasi) bo‘yicha jinoyat ishi qo‘zg‘atilgan.

Tezkor-qidiruv tadbirlari davomida ushbu jinoyatni sodir etishda gumonlanuvchi shaxs aniqlanib, 1984 yilda tug‘ilgan K.D.ning Issiq-Ota tumanidagi Novopokrovka qishlog‘ida uning yashash joyini tintuv qilish chog‘ida quyidagi ta’sirchan qurollar topildi:

• “Sayga” karabini;
• TOZ quroli;
• travmatik to‘pponcha;
• ikki zarbli miltiq;
• Kalashnikov avtomati uchun 584 ta o‘q;
• 7 ta kuzatuvchi patron;
• 5x6 mm kalibrli 680 dan ortiq patron;
• “Sayga” karabini uchun magazin, quroldan murvatlar(zatvor);
• porox, o‘q, patronlar;
• pichoqlar, durbin;
• 8 ta mobil telefon.

Bundan tashqari, “Sayga” karabinidan 2 dona magazin, quroldan 2 dona bolt, 7 dona SO2 ballonlari, 8 dona porox, bir litrli shisha o‘q, 143 dona patron, 222 dona gilzadagi patron va 3 dona kapsula musodara qilindi.

Holat yuzasidan zarur bo‘lgan sud-tibbiy ekspertizalar tayinlangan. Hozirda Chuy viloyati Ichki ishlar bosh boshqarmasi tomonidan ushbu jinoyatni sodir etishga aloqador qolgan shaxslarni ham aniqlash bo‘yicha tergov-tezkor tadbirlari davom ettirilmoqda.

Eslatib o‘tamiz, kecha, 6 fevral kuni Qirg‘izistonning Jalolobod viloyatida mamlakatning maxsus xizmat xodimlari Iskandar Hamroqulov ismli shaxsni firibgarlikda gumon qilib qo‘lga olgandi. U Milliy xavfsizlik davlat qo‘mitasining Jalolobod viloyati bo‘yicha hududiy boshqarmasi rahbariyati bilan yaqin aloqada bo‘lganini aytib, fuqarolarni noto‘g‘ri yo‘lga boshlagan, huquqni muhofaza qiluvchi va sud organlari tomonidan jinoyat ta’qibiga doir masalalarni hal etishda vositachilik xizmatlarini taklif qilgan.