Qidiruvdagi qozog‘istonlik bokschi AQSHda bo‘lishi mumkin

Qozog‘istonlik boks bo‘yicha sobiq jahon chempioni Beybut Shumenov Amerika Qo‘shma Shtatlarida ekani taxmin qilinmoqda. Bu haqda bugun, 8 avgust kuni Qozog‘iston Respublikasi Ichki ishlar vaziri Marat Axmetjanov xabar berdi.

Axmetjanovning so‘zlariga ko‘ra, sobiq sportchi ustidan tergov hali ham davom etmoqda, u hamon qidiruvda.

“U AQSHda bo‘lishi mumkin. Hozirda tegishli organlarga alohida ko‘rsatmalar yuborilgan, zarur tergov harakatlari olib borilmoqda”, degan mamlakat bosh politsiyasi xodimi.

Uning ta’kidlashicha, bokschini qidirish uchun mamlakat byudjetidan maxsus mablag‘ sarflanmaydi, chunki Qozog‘iston ko‘plab mamlakatlar bilan huquqiy yordam ko‘rsatish to‘g‘risida shartnomalar tuzgan.

Ma’lumotlarga ko‘ra, Beybut Shumenovning rafiqasi Amerika fuqaroligiga ega.

Eslatib o‘tamiz, joriy yilning 18 iyul kuni Qozog‘istonning Ostona shahrida boks bo‘yicha sobiq jahon chempioni Beybut Shumenov qo‘lida bolasi bor erkak bilan mushtlashib qolgan edi. Shundan so‘ng unga nisbatan joriy yilning 22 iyul kuni rasman qidiruv e’lon qilingan.