Italiya Prezidenti O‘zbekistonga keladi

Joriy yilning 9 noyabr kuni Italiya Prezidenti Serjo Mattarella O‘zbekistonga keladi. Bu haqda “Nova” agentligi xabar berdi.

Ma’lum qilinishicha, Italiya Prezidenti Serjo Mattarella mamlakatning Osiyodagi istiqbolini mustahkamlash va hozirgi xalqaro panoramada katta strategik ahamiyatga ega ikki davlat bilan hamkorlik qilish maqsadida ikki tomonlama missiya bilan Janubiy Koreya va O‘zbekistonga keladi.

Missiya 7 noyabr kuni Seuldan rasman boshlanadi. Unda milliy qabristonga gul qo‘yish va Koreya Milliy muzeyida to‘xtash rejalari ko‘zda tutilgan. 8 noyabr kuni delegatsiya Shimoliy Koreya bilan chegaradagi qurolsizlantirilgan hududdagi Panmunjom qo‘shma xavfsizlik hududiga tashrif buyuradi.

Shu bilan birga, Janubiy Koreya Prezidenti Yun Sok Yol bilan uchrashuv, so‘ngra rasmiy delegatsiyalar ishtirokidagi muzokaralar bo‘ladi.

Shuningdek, xalqaro maydondagi eng qizg‘in muammolar, jumladan Isroil-Falastin mojarosi, Xitoyning Janubiy Xitoy dengizida tobora kuchayib borayotgani va Ukrainadagi urush bo‘yicha muhokamalar bo‘lib o‘tadi, bu voqealar O‘zbekistonda ham keng muhokama qilinadi.

9 noyabr kuni esa Italiya rahbari O‘zbekistonga keladi. 

“Toshkent bilan hamkorlik Italiya uchun, ayniqsa, Yevropa va Uzoq Sharq, shuningdek, Rossiya va Xitoy kabi yirik mintaqaviy davlatlar o‘rtasidagi tarixiy aloqa mintaqasida joylashgan mamlakatning strategik pozitsiyasi tufayli alohida ahamiyat kasb etadi. Italiya va O‘zbekiston, shuningdek, sarmoyalarni himoya qilish va ilmiy-madaniy hamkorlik bo‘yicha qator muzokaralarda ishtirok etmoqda, ularning borishi Mattarella o‘zbekistonlik hamkasbi Shavkat Mirziyoyev bilan 10 noyabr kuni Toshkentda bo‘lib o‘tishi rejalashtirilgan uchrashuvda baholanadi”, deyiladi xabarda.

Shu kuni Matarella Turin Politexnika universitetida to‘xtashi rejalashtirilgan, bu universitetlar almashinuvini sarhisob qilish, iqtisodiy va texnologik sohalardagi rivojlanish hamda hamkorlikning yangi salohiyatli yo‘nalishlarini baholash imkonini beradi.

Tashrif 11 noyabr kuni O‘zbekiston Samarqand shahrida yakunlanadi.

Eslatib o‘tamiz, shu yilning 7 iyun kuni O‘zbekiston Respublikasi Prezidenti Shavkat Mirziyoyev Italiya Prezidenti Serjo Mattarellaning taklifiga binoan rasmiy tashrif bilan Rim shahriga borgandi. Ushbu tashrifda Mirziyoyev Italiya rahbari Serjo Mattarella va Bosh vaziri Jorjia Meloni bilan muzokaralar olib borgandi.