Isroilning HAMASga qarshi quruqlikdagi operatsiyasi qachon boshlanishi ochiqlandi  

Isroil rahbariyati AQSHdan yetarli miqdordagi raketaga qarshi mudofaa tizimlarini olgandan so‘ng, G‘azo sektorida quruqlikdagi operatsiyani boshlaydi. Bu haqda manbalariga tayanib, “The Jerusalem Post” gazetasi xabar berdi. 

Qayd etilishicha, Isroilning harbiy va siyosiy rahbariyati G‘azoda quruqlikdagi operatsiyani boshlaganida, "Hizbulloh" va Eronning javob choralari bo‘lishidan xavfsirayapti. Shuning uchun ham Isroil mudofaa kuchlari G‘azoda operatsiya boshlashdan oldin Qo‘shma Shtatlardan yanada ko‘proq raketaga qarshi mudofaa tizimlarining yetib kelishini kutmoqda.

Yana bir manbaning qayd etishicha, operatsiya boshlanishidan oldin Isroil rahbariyati HAMAS jangarilari tomonidan isroillik harbiylarga qarshi partizan urushining oldini olish uchun G‘azo sektoriga barcha qurol kontrabandasi kanallarini maksimal darajada to‘xtatmoqchi.

Ismini oshkor qilmaslik sharti bilan gapirgan yuqori martabali isroillik generallarning aytishicha, armiya operatsiya davomida imkon qadar ko‘proq garovga olinganlarni qutqarish uchun tavakkal qilishga tayyor. Ammo rahbariyat bu vazifaning murakkabligini yaxshi biladi.