Isroil va HAMAS sulh rejasining asosiy shartlari bo‘yicha kelishib oldi – WP 

Isroil va HAMAS G‘azo sektoridagi mojaroni tinch yo‘l bilan hal qilish rejasining asosiy shartlarini kelishib oldi. Bu haqda manbalariga tayanib, “The Washington Post” xabar berdi.

Anonim qolishni istagan AQSH ma’muriyati vakilining so‘zlariga ko‘ra, hujjatning asosiy qoidalari kelishib olingan, tomonlar uni amalga oshirish tafsilotlarini muhokama qilmoqda. Biroq boshqa amerikalik rasmiylarning nashrga tushuntirishicha, bu kelishuv imzolanadi, degani emas.

Rejaning tafsilotlari “juda murakkab” va kelishish uchun vaqt kerak bo‘ladi.

31 may kuni AQSH Prezidenti Jo Bayden G‘azoda tinchlik o‘rnatish bo‘yicha uch bosqichdan iborat yangi kelishuv loyihasi shartlarini e’lon qildi.

Birinchisi olti haftaga mo‘ljallangan bo‘lib, to‘liq o‘t ochishni to‘xtatish, isroillik qo‘shinlarini aholi punktlaridan olib chiqib ketish, Isroil qamoqlaridan yuzlab falastinlik mahbuslarni ozod qilish evaziga HAMAS tomonidan garovga olinganlarni ozod etishni nazarda tutadi.

Bu davrda tomonlar muzokaralarni boshlashi kerak va o‘zaro kelishuvga erishilgunga qadar sulh o‘z kuchida qoladi.

Ikkinchi bosqich barcha garovga olinganlarni, jumladan harbiy xizmatchilarni ozod qilishni, uchinchi bosqich G‘azo sektorini tiklash va halok bo‘lgan isroilliklarning jasadlarini yaqinlariga topshirishni o‘z ichiga oladi.