Isroil Filadelfiya koridorini nazoratga oldi

Isroil Mudofaa kuchlari G‘azo sektori va Misr o‘rtasidagi chegarada joylashgan 14 kilometrlik bufer zona vazifasini bajaruvchi Filadelfiya koridorini "operativ nazoratga oldi". Bu haqda kecha, 29 may kuni SAXAL rasmiy vakili Daniel Hagariy ma’lum qildi.

G‘azo sektori chegaralari bo‘ylab o‘tuvchi Filadelfiya yo‘lagi 1979 yilda Isroil va Misr o‘rtasidagi tinchlik kelishuvi doirasida yaratilgan. Isroil armiyasi undan G‘azo sektorini tark etishdan oldin patrul qilish uchun foydalangan.

AFP’ning xabar berishicha, Isroil G‘azo sektori va Misr o‘rtasidagi chegaradagi 14 kilometrlik bufer zonadan Misrdan HAMASga qurol olib o‘tishda foydalanilyapti, deya gumon qilmoqda.

Hagariyning so‘zlariga ko‘ra, Isroil harbiylari Filadelfiya yo‘lagi bo‘ylab 20 ga yaqin tunnelni aniqlagan. O‘z navbatida, Misrning yuqori martabali vakili bu ma’lumotlarni rad etdi.

“Isroil Falastinning Rafah shahriga qarshi operatsiyani davom ettirishni oqlash va urushni siyosiy maqsadlarda cho‘zish uchun bu ayblovlarga murojaat qilmoqda”, deydi Misr rasmiysi.

Qayd etish joizki, Isroil mudofaa kuchlari xalqaro tanqidlarga qaramay, G‘azo sektori janubidagi Rafah shahrida harbiy amaliyotlarini davom ettirmoqda. OAV shahar tanklardan va havodan o‘qqa tutilayotgani haqida xabar bermoqda. Oxirgi uch hafta ichida G‘azo sektorining Misr bilan chegarasida joylashgan Rafah shahridan 1 millionga yaqin falastinliklar jangovar harakatlar tufayli qochib ketgan.