AQSHning ketidan Isroil ham BMT Inson huquqlari kengashidan chiqdi

Isroil kecha, 5 fevral kuni BMT Inson huquqlari kengashi tarkibidan chiqdi. Bu haqda mamlakat Tashqi ishlar vaziri Gideon Saar o‘zining X sahifasida ma’lum qildi.

“Kengash an’anaviy ravishda inson huquqlarini buzuvchilarni himoya qilib, ularga nazoratdan yashirishga imkon beradi va buning o‘rniga Yaqin Sharqdagi yagona demokratiyani – Isroilni vasvasaga soladi. Ushbu organ asosiy e’tiborni inson huquqlarini targ‘ib qilish o‘rniga demokratik davlatga hujum qilish va antisemitizmni targ‘ib qilishga qaratgan”, deya yozgan Saar.

Tashqi ishlar vazirligi rahbarining so‘zlariga ko‘ra, BMT Inson huquqlari kengashida Isroil yagona davlat bo‘lib, uning kun tartibi faqat unga bag‘ishlangan. Uning ta’kidlashicha, bu organ Isroilni qoralovchi 100 dan ortiq rezolyutsiyalarni qabul qilgan, bu kengash tomonidan qabul qilingan rezolyutsiyalar umumiy sonining 20 foizdan ortig‘ini tashkil etadi. Bu Eron, Kuba, Shimoliy Koreya va Venesuelaga nisbatan qabul qilinganidan ko‘p.

Ma’lumot o‘rnida, BMT Inson huquqlari kengashi 47 davlatdan iborat bo‘lgan hukumatlararo organ hisoblanadi. U 2006 yilda BMT Bosh Assambleyasi tomonidan inson huquqlarini butun dunyoda himoya qilish va hurmat qilishni targ‘ib qilish maqsadida tashkil etilgan. 2018 yilda Oq uy rahbari Donald Tramp AQSHni BMT Inson huquqlari kengashidan chiqarganida kengash 2006 yildan beri 70 dan ortiq Isroilga qarshi rezolyutsiya qabul qilgan, bu Eron bo‘yicha qabul qilingan rezolyutsiyalar sonidan 10 baravar ko‘p ekani aytiladi.

Eslatib o‘tamiz, avvalroq AQSH Prezidenti Donald Tramp mamlakatni BMTning “antiamerikan” tashkilotlaridan chiqarish to‘g‘risida farmon imzolagandi. BMT Inson huquqlari kengashi va Falastin qochqinlariga yordam berish bo‘yicha Yaqin Sharq agentligi (UNRWA) shular jumlasidan. Trampning bayonotida ta’kidlanishicha, BMT Inson huquqlari kengashi o‘zining asosiy maqsadini bajarmagan va inson huquqlarini buzayotgan davlatlarni himoya qilish vositasiga aylangan.