Iroq Eron va Turkiya bilan chegaraga 6000 dan ortiq askar joylashtirdi

Iroq yaqinda Eron va Turkiya bilan chegarada Ichki ishlar vazirligi kuchlaridan 6000 dan ortiq harbiy xizmatchini joylashtirgan. Bu haqda Iroq Ichki ishlar vazirligi rahbari Abdul Amir al-Shammariy ma’lum qildi. 

“Biz Eron va Turkiya bilan chegaradagi Iroq Kurdistoniga 6000 dan ortiq askarni joylashtirdik. Iroq chegaralari “qizil chiziq” va biz uning xavfsizligini ta’minlash uchun hech narsadan to‘xtamaymiz”, deydi vazir “Al Hadath” telekanaliga bergan intervyusida.  . 

Al-Shammariyning qo‘shimcha qilishicha, yaqinda Suriya bilan chegarada 650 km uzunlikdagi devor o‘rnatilgan, Iroq chegaralari yaxlitligini ta’minlash uchun zamonaviy uskunalar ham xarid qilingan. Bundan tashqari, uning ta’kidlashicha, turk tomoni bilan kelishilgan holda ularda chegara qo‘riqlash postlarini qurish uchun 17 ta maydon aniqlangan. 

ISHID terrorchilik guruhi qoldiqlariga qarshi kurash masalasiga kelsak, al-Shammariy bu borada “qo‘shni davlatlar bilan doimiy muvofiqlashtirish o‘rnatilgani va bu yuqori darajada saqlanib qolayotganini” ta’kidladi. Uning so‘zlariga ko‘ra, xalqaro aksilterror koalitsiya ham “mamlakat chegara qo‘shinlari qo‘mondonligi bilan ma’lumot almashmoqda”. 

O‘tgan yilning noyabr oyida Iroq hukumati huzuridagi Xavfsizlik kengashi Turkiya va Eron tomonidan Iroq Kurdistonini ommaviy bombardimon qilganidan so‘ng ikki qo‘shni davlat bilan chegaralarni himoya qilishni kuchaytirish bo‘yicha bir qator chora-tadbirlar ko‘rishga qaror qildi. Dekabr oyi boshida Iroq Bosh vaziri Muhammad as-Sudani ikki davlat Qurolli kuchlari va kurd tuzilmalari o‘rtasidagi mojarolarga barham berish uchun chegarachilarga Turkiya va Eron bilan chegarada “nol chiziqni ushlab turish”ni buyurgan edi. Anqara Iroq shimolida alohida harbiylashtirilgan bo‘linmalari joylashgan Kurdiston ishchilar partiyasi (terrorchilik tashkiloti)ni milliy xavfsizlikka tahdid solayotgan asosiy kuchlardan biri deb biladi. Tehronning da’vo qilishicha, kurd tuzilmalari Erondagi vaziyatni beqarorlashtirmoqda.