Imomali Rahmon o‘quvchilarni prezidentni kutib olish tadbirlariga chaqirishni taqiqladi

Tojikiston Prezidenti Imomali Rahmon maktab o‘quvchilarini hukumat vakillari bilan uchrashuvlarga olib borish amaliyotini keskin tanqid qildi. Bu haqda “Asia Plus” nashri xabar berdi.

Qayd etilishicha, Imomali Rahmon joriy yilning 1 sentyabr kuni “Bilimlar kuni” munosabati bilan qilgan nutqida mamlakat ta’lim tizimidagi boshqa bir qator jiddiy muammolardan ham keskin noroziligini bildirgan.

Prezident maktab o‘quvchilari, talabalar va o‘qituvchilarni davlat amaldorlari, jumladan, o‘zini kutib olishga chiqarish amaliyotini qoraladi. Davlat rahbari o‘z nutqida bu kabi ishlar o‘rinsiz va o‘z ko‘rsatmalariga zid ekanini alohida ta’kidladi.

“Men buni taqiqladim. Agar amaldor kelsa, bu yaxshi, lekin u mehmon emas, bu uning mamlakati. Kelsin, ko‘rib, o‘z sohasidagi kamchiliklarni tuzatsin. Mehmon degani boshqa davlatdan kelgan odamdir”, deydi Rahmon.

Uning so‘zlariga ko‘ra, bolalarni rasmiylar bilan uchrashuvlarga olib borish o‘quvchilar uchun jazo hisoblanadi, chunki ular yomon ob-havo, jazirama va shamolda soatlab ko‘chada turishga majbur bo‘ladi, bu esa mutlaqo qabul qilinishi mumkin emas.

“Bolalarning asosiy vazifasi o‘qish, turli tadbir va ochilish marosimlarida qatnashish emas”, deydi Prezident.

U tegishli tuzilmalar, jumladan, Inson huquqlari bo‘yicha vakilga tuman va shahar miqyosidagi tadbirlarda bunday huquqbuzarliklarga yo‘l qo‘ymaslik bo‘yicha topshiriq berdi. Respublika miqyosidagi tadbirlar bundan mustasno.

Shuningdek, Tojikiston Prezidenti ba’zi ta’lim muassasalarida bolalar xorijda bo‘lsa-da, darsda qatnashayotgani ko‘rsatilayotganini ta’kidladi.

“Bu, ayniqsa, tadbirkorlar yoki amaldorlarning farzandlariga tegishli. Bu amaliyotga barham berish kerak”, deydi u.

Davlat rahbari o‘quvchilardan asossiz pul undirish, jumladan, o‘qituvchilarning tug‘ilgan kuni uchun yig‘imlar olish amaliyotini ham tanqid qildi.

“Yoshligimda bunday emas edi. Hech kim o‘qituvchilarga sovg‘alar uchun pul yig‘magan yoki kimning tug‘ilgan kuni qachon ekanini muhokama qilmagan. Bunday amaliyotlarga yo‘l qo‘yib bo‘lmaydi”, deydi Prezident.

Shuningdek, tuman va shaharlarning tegishli tuzilmalariga o‘qituvchilarni rasmiy yig‘ilishlar yoki tadbirlar uchun mablag‘ yig‘ishga jalb qilmaslikni topshirdi.

“Bunday tadbirlar ta’lim muassasalaridagi to‘lovlar hisobiga emas, balki faqat davlat organlari tomonidan moliyalashtirilishi kerak”, deydi Rahmon.

Tojikiston rahbari o‘qituvchilar bilan ziddiyatga borgan ayrim ota-onalarni ham qoralab, bu ularning odobsizligini ko‘rsatishini ta’kidladi.

“Ota-ona lavozimi qanday bo‘lishidan qat’i nazar, o‘qituvchilarni hurmat qilishi va qadrlashi kerak. O‘qituvchilarsiz prokurorlar ham, politsiyachilar ham, muvaffaqiyatli ta’lim ham bo‘lmaydi. Agar o‘qituvchilar bo‘lmaganida men ham, bu yerda o‘tirgan barchangiz ham, vazirlar ham, amaldorlar ham bu yerda bo‘la olmas edik”, deydi Imomali Rahmon.