Ilon Mask 400 mlrd dollardan ortiq boyligi bor dunyodagi ilk odamga aylandi

Amerikalik milliarder, SpaceX va Tesla asoschisi Ilon Mask tarixda boyligi 400 milliard dollardan oshgan birinchi shaxs bo‘ldi. Bu haqda “Bloomberg” xabar berdi.

Oxirgi qadam SpaceX kompaniyasiga aksiyalarni sotish bo‘ldi, bu “Bloomberg Billionaires Index” ma’lumotlariga ko‘ra Maskning sof boyligini taxminan 50 milliard dollarga oshirib, 439,2 milliard dollarga yetkazdi. Maskning bir kunlik boyligi 62,8 milliard dollarga o‘sishi rekord darajadagi eng katta ko‘rsatkich bo‘lib, indeksga ko‘ra, birinchi marta dunyodagi eng boy 500 kishining umumiy boyligini 10 trillion dollardan oshirishga yordam bergan.

“Forbes”ga ko‘ra, hozirda Maskning boyligi 367,5 milliard dollarni tashkil qiladi. U hali ham jurnalning milliarderlar ro‘yxatida birinchi o‘rinda qolmoqda.

“Bloomberg” ta’kidlashicha, 2022 yil oxirida Maskning kapitali 200 milliard dollardan ko‘proqqa qisqargan, biroq yaqinda o‘sishni boshlagan va ayniqsa Qo‘shma Shtatlarning saylangan prezidenti Donald Trampning saylovdagi g‘alabasidan keyin keskin o‘sgan.

Tesla aksiyalari 65 foizga o‘sdi, bu Trampning o‘zi boshqariladigan avtomobillarni ishlab chiqarishni osonlashtirishi va elektromobillar uchun soliq imtiyozlarini tugatishi haqidagi umidlar bilan kuchaygan.

Maskning boshqa kompaniyasi SpaceX hozirda 350 milliard dollarga baholanib, u dunyodagi eng qimmat xususiy startapga aylangan.

Mask boyligi bo‘yicha Amazon asoschisi Jeff Bezos va Meta rahbari Mark Sukerbergdan oldinda bormoqda.

Eslatib o‘tamiz, avvalroq “The Guardian” Ilon Maskning 3 yil ichida trillionerga aylanishi prognoz qilinayotgani haqida yozgandi. “Informa Connect Academy” guruhining hisob-kitoblariga asoslansa, Maskning boyligi yillik o‘rtacha 110 foizga o‘sib bormoqda. 2028 yilda biznes-konglomerat asoschisi Gautam Adani (Hindiston) dunyodagi ikkinchi trillionerga aylanadi. Uning boyligi yiliga o‘rtacha 123 foizga oshadi. Shuningdek, 2028 yilda Nvidia bosh direktori Jensen Xuang va indoneziyalik magnat Prajogo Pangestu bir trillionga ega bo‘lishi mumkin.