Ichida bolalar bo‘lgan Damas Farg‘ona kanaliga tushib ketdi (video)

Farg‘ona viloyatining Toshloq tumanida Damas haydovchisi ikki nafar farzandi bilan kanalga tushib ketdi. Bu haqda Favqulodda vaziyatlar vazirligi xabar berdi.

Ma’lum qilinishicha, kecha, 19 oktyabr kuni soat 17:07 da Toshloq tumanining “Naymanbo‘ston” MFYda yashovchi fuqaroning boshqaruvida bo‘lgan Damas rusumli avtomobil ehtiyotsizlik oqibatida Farg‘ona kanaliga tushib ketgan.

FVBga kelib tushgan xabarga asosan qutqaruvchilar aytilgan manzilga yetib borib, maxsus texnika va qutqaruv asbob-anjomlari yordamida avtomobil kanaldan chiqarib olingan. Avtomobilda haydovchi bilan birga ikki nafar voyaga yetmagan farzandi bo‘lgan. Haydovchi va uning ikki nafar farzandi mashina suvga tushgan vaqtda o‘z harakatlari bilan quruqlikka chiqib olgan.

FVV xabariga ko‘ra, hodisa oqibatida tan jarohati olgan va halok bo‘lganlar yo‘q.

Eslatib o‘tamiz, avvalroq Sirdaryo viloyatida Nexia-2 haydovchisi va yana to‘rt nafar yo‘lovchi kanalga cho‘kib ketgani haqida xabar berilgandi. Avtomashina viloyatning Shirin shahridagi Mirzo Ulug‘bek mahallasini Nurobod mahallasi bilan bog‘lab turuvchi “Janubiy Mirzacho‘l” kanali ustidagi transport vositalarining o‘tishi uchun mo‘ljallangan ko‘prikda boshqarib borayotib, nazoratni yo‘qotgan hamda yo‘nalishga nisbatan chap tomondagi ko‘prik to‘sinlariga urilib, kanalga tushib ketgan. Oqibatda mashinada bo‘lgan haydovchi va 4 nafar yo‘lovchi hodisa joyida cho‘kib ketgan.