HUMAN’ning kirdikori yuzasidan sud jarayoni boshlandi

Jamiyat

image

“HUMAN xususiy bandlik agentligi” MCHJ bilan bog‘liq voqealar tafsiloti saytimiz orqali e’lon qilib borilmoqda. Jumladan, ushbu MCHJ mansabdor shaxslariga nisbatan O‘zbekiston Respublikasi jinoyat kodeksining firibgarlik moddasi bilan qo‘zg‘atilgan jinoyat ishi bo‘yicha dastlabki tergov harakatlari  yakunlangani haqida xabar bergan edik.

Bundan tashqari, “HUMAN xususiy bandlik agentligi” MCHJ rahbari Sh.Fayzullayevga nisbatan O‘zbekiston Respublikasi JKning 168-moddasi 4-qismi “a” bandi bilan qo‘zg‘atilgan jinoyat ishi bo‘yicha dastlabki tergov harakatlari yakunlanib, jinoyat ishi bo‘yicha ayblov xulosasi Toshkent viloyat prokuraturasi 11 dekabr kuni tasdiqlanib, Jinoyat ishlari bo‘yicha Toshkent viloyati sudiga yuborilgani ham ma’lum qilingan edi. 

Bugun, 16 dekabr kuni, jinoyat ishlari bo‘yicha Toshkent viloyat sudida Shoxnur Fayzullayev (1992 yilda Qashqadaryo viloyatida tug‘ilgan, millati - o‘zbek, O‘zbekiston Respublikasi fuqarosi, ma’lumoti – oliy, oilali, muqaddam sudlanmagan, “HUMAN” xususiy bandlik agentligi” MCHJ rahbari) ga nisbatan jinoyat ishini ko‘rib chiqish bo‘yicha ochiq sud jarayoni boshlandi.

Sudlanuvchi Sh. Fayzullayev O‘zbekiston Respublikasi Jinoyat kodeksining 168-moddasi (firibgarlik) 4-qismi “a” bandi, 179-moddasi (soxta tadbirkorlik), 189-moddasi (savdo yoki xizmat ko‘rsatish qoidalarini buzish) 1-qismi, 192-11-moddasi 2-qismi “a” bandi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish), 227-moddasi (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) 2-qismi “a” bandi va 243-moddasi (jinoiy faoliyatdan olingan daromadlarni legallashtirish)da nazarda tutilgan jinoyatlarni sodir etganlikda ayblanmoqda.

Dastlabki tergov organi tomonidan qo‘yilgan ayblovga ko‘ra, Toshkent shahrida joylashgan “HUMAN” xususiy bandlik agentligi” MCHJning rahbari Sh. Fayzullayev va boshqalar respublika viloyatlarida vakolatxonalar tashkil etib, jamiyat tashkil topgan kundan 2019 yil 13 sentyabrga qadar bo‘lgan vaqt oralig‘ida fuqarolarni Germaniya, Chexiya, Yaponiya, Koreya Respublikasi, Bolgariya va Litva davlatlariga ishga joylashtirishni va’da qilgan. Har bir fuqarodan taklif etilgan ishdan kelib chiqqan holda 6 300 000 so‘mdan 35 000 000 so‘mgacha pullarni agentlikning bank hisob raqamiga to‘lash yo‘li bilan qo‘lga kiritib, ushbu fuqarolarni hech qayerga yubormasdan, o‘zganing juda ko‘p miqdordagi pullarini firibgarlik yo‘li bilan qo‘lga kiritgan.

Bundan tashqari, Sh. Fayzullayev o‘zining jinoiy harakatlarini davom ettirib, boshqa shaxslar bilan oldindan jinoiy til biriktirgan. Tuzilgan jinoiy reja asosida, “HUMAN” xususiy bandlik agentligi” MCHJni tashkil etib, AKIB «Ipoteka bank» Yakkasaroy filialidan jamiyat hisob raqamini ochib, g‘ayriqonuniy yo‘llar bilan boylik orttirish maqsadida, tovarlar savdosi qoidalarini juda ko‘p miqdorda buzib, 143 080 000 so‘m pul mablag‘lari korxonaning buxgalteriya hisob registrlarida tegishli tartibda aks ettirmasdan, belgilangan tartibda bank muassasasiga topshirmaganligi, jamiyatning birlamchi buxgalteriya hujjatlarini yashirib, nobud qilib, hujjatli tekshiruvga taqdim qilmaganligi, jinoiy yo‘l bilan topilgan pullarning kelib chiqishiga qonuniy tus berishga erishganligi, soxta tadbirkorlik faoliyati bilan shug‘ullanib, o‘z mansab vakolatidan qasddan foydalanib, fuqarolarning huquqlari va qonun bilan qo‘riqlanadigan manfaatlariga juda ko‘p miqdordagi zarar yetkazganligi aniqlangan.

O‘zbekiston Respublikasi Oliy sudi matbuot xizmatining xabar berishicha,  Jinoyat ishi bo‘yicha dastlabki tergov harakatlari O‘zbekiston Respublikasi IIV huzuridagi Tergov departamenti tomonidan olib borilgan.

Jinoyat natijasida 1 198 nafar fuqaroning manfaatlariga zarar yetkazilgan. 

Jinoyat ishi doirasida 5 ta ko‘chmas mulk va 5 ta avtotransport vositasi xatlangan.

Jabrlanuvchilar ko‘pligi va turli hududlardan bo‘lgani bois, ularni sud majlislarida ishtirok etishini yashash joylaridagi sudlar binolarida o‘rnatilgan videokonferensaloqa tizimi orqali ta’minlash rejalashtirilgan.

Mazkur jinoiy ish jinoyat ishlari bo‘yicha Toshkent viloyat sudi sudyasi Xayrulla Rahmonov raisligida ko‘rib chiqilmoqda.

Sud jarayoni davom etmoqda.
 


Maqola muallifi

Teglar

HUMAN

Baholaganlar

42

Reyting

3.1

Maqolaga baho bering

Doʻstlaringiz bilan ulashing