Gvardiola APLda rekord o‘rnatdi

Kecha, 14 dekabr kuni Angliya Premer ligasining 17-turi doirasida “Manchester Siti” o‘z maydonida “Lids”ni qabul qilib, 7:0 hisobida g‘alaba qozondi.

Bu uchrashuv “shaharliklar” bosh murabbiyi Xosep Gvardiolaga APL yangi rekordini o‘rnatish imkonini berdi.

Ispaniyalik mutaxassis jamoalariga chempionatda 500 ta gol urish uchun bor-yo‘g‘i 207 o‘yin kerak bo‘ldi. Avvalgi rekord Yurgen Klopp va “Liverpul”ga tegishli bo‘lib, ular 234 ta o‘yinda 500 ta gol urishgan.

Eslatib o‘tamiz, “shaharliklar” ayni damda Angliya chempionatida 41 ochko jamg‘argan holda (13 g‘alaba, 2 durang, 2 mag‘lubiyat) peshqadamlik qilmoqda. “Liverpul” 37 ochko bilan ikkinchi o‘rinda joylashgan (11 g‘alaba, 4 durang va 1 mag‘lubiyat).

Ma’lumot uchun, UEFA Chempionlar ligasi qur’asiga ko‘ra “Man Siti” Portugaliyaning “Sporting” klubi bilan bahs olib borsa, “Liverpul” Italiyaning “Inter”i bilan hisob-kitob qiladi.