Goli hisoblanmagan Ronaldu operatorga suv sepdi

Bugun, 29 iyul kuni Arab chempionlar kubogining guruh bosqichi “C” guruhidan o‘rin olgan “Al-Nasr” va “Al-Shabab” uchrashuvi bo‘lib o‘tdi. Mazkur bahsda Riyod klubi hujumchisi portugaliyalik Krishtianu Ronaldu asosiy tarkibga kiritilmadi. Faqat ikkinchi bo‘limning 62-daqiqasida zaxiradan maydonga tushirildi. 

Shuningdek, u 74-daqiqada “Al-Shabab” darvozasiga uchrashuvdagi ilk golini kiritdi. Biroq ushbu gol o‘yindan tashqari holatda kiritilgan deb topildi va hisobga olinmadi. Shu tariqa o‘yin klublarning nursiz durangi bilan yakunlandi. 

Uchrashuvdan so‘ng portugaliyalik forvard bahsdagi natija va holatlardan g‘azablanish fonida jamoadoshlariga baqirdi va keskin norozilik bildirib, qo‘l siltadi hamda uni tasvirga olayotgan operatorga suv sepib yubordi.

Ma’lumot uchun, Arab chempionlar kubogi Saudiya Arabistonining uchta shahrida o‘tkaziladi. Turnirda Saudiya Arabistoni, Quvayt, BAA, Qatar, Misr, Liviya, Jazoir, Tunis, Marokash va Iroq nomidan 16 ta klub ishtirok etadi. Jamoalar 4 guruhga 4 tadan bo‘lingan va eng yaxshi 8 klub pley-offda kurashni davom ettiradi. Turnir g‘olibi 6 million dollar miqdoridagi pul mukofotiga ega bo‘ladi.

“Al-Nasr” ishtirok etayotgan “C” guruhidagi birinchi turning boshqa o‘yinida Misrning “Zamalek” jamoasi Tunis klubini 4:0 hisobida mag‘lubiyatga uchratdi.