Germaniyadagi shaharga ko‘chib o‘tganlarga tekinga turarjoy beriladi

Sharqiy Germaniyada joylashgan Ayzenxyuttenshtadt shaharchasi aholisi sonini oshirish maqsadida yangi ko‘chib keluvchilarga ikki haftalik bepul turarjoy taklif qilmoqda. Bu haqda CNN xabar berdi.

Polsha bilan chegaradosh va poytaxt Berlindan 60 mil uzoqlikda joylashgan ushbu shahar 13 may kuni mahalliy kengash tomonidan e’lon qilingan bayonotga ko‘ra, 14 kunlik bepul sinov yashash imkoniyatini taklif qilmoqda.

Qayd etilishicha, loyiha “Ayzenxyuttenshtadtga ko‘chib o‘tishni istaganlarga – masalan, qatnovchilar, shaharga qaytishni o‘ylayotganlar, malakali mutaxassislar yoki muhitni o‘zgartirmoqchi bo‘lgan yakka tadbirkorlar uchun” mo‘ljallangan. Arizalar iyul boshigacha qabul qilinadi.

Tanlangan ishtirokchilar 6 sentyabrdan 20 sentyabrgacha shahar markazidagi to‘liq jihozlangan bepul kvartirada yashaydi. Bu loyiha “Hozir reja tuz” nomli innovatsion ko‘chirish tashabbusining bir qismidir.

Shahar kengashining aytishicha, ishtirokchilar uchun shahar hayoti, ishlash va jamoani his qilish uchun ekskursiyalar, zavod sayohatlari va boshqa turli tadbirlar tashkil etiladi. Mahalliy korxonalar amaliyot, ish kuzatuv kurslari va suhbatlar orqali ishtirokchilarning shaharda doimiy qolishini rag‘batlantiriladi.

1950 yilda sobiq Sharqiy Germaniyada tashkil etilgan Ayzenxyuttenshtadt (“Po‘lat zavodi shahri” degan ma’noni anglatadi) Oder daryosi bo‘yida qurilgan.
Shahar ilgari Stalinstadt (Stalin shahri) deb atalgan, lekin 1989 yildagi Berlin devorining qulashidan keyin G‘arbiy va Sharqiy Germaniya birlashgach, hozirgi nomini olgan.

Mahalliy rasmiy Yuliya Basanning aytishicha, shahar aholisi soni bir paytlar 50 mingdan oshgan bo‘lsada, hozirda 24 ming atrofida. Aholi kamayishini to‘xtatish uchun loyiha ayniqsa malakali ishchilarni jalb qilishga qaratilgan.

Bugungi kunda Ayzenxyuttenshtadt sharqiy Germaniyadagi eng yirik birlashtirilgan po‘lat ishlab chiqarish zavodiga ega bo‘lib, u yerda 2 500 kishi ishlaydi. Shahar metallarni qayta ishlash markazi sifatida ham tanilgan.

Ko‘plab ijtimoiy binolar tarixiy obida sifatida ro‘yxatga olingan bo‘lib, shaharning ochiq tuzilmasi arxitekturaga qiziqqan mehmonlarni jalb qiladi.