Xarobalar ostidagi Ramazon. G‘azodagi ayollar hayitga tayyorlanmoqda

Isroil tomonidan davom etayotgan hujumlar va qattiq blokadaga qaramay, G‘azodagi ayollar muqaddas Ramazon oyi tugashi munosabati bilan Ramazon hayiti oldidan bolalarni xursand qilish uchun an’analarini saqlab, bayram pishiriqlarini pishirishda davom etmoqda. Bu haqda “Anadolu” xabar berdi.

G‘azo sektori janubidagi Xon Yunus shahrida Al-Huroniy maktabidan boshpana topgan ko‘chirilganlar cheklangan imkoniyatlarga qaramay, mahalliy madaniyatning ajralmas qismi bo‘lgan an’anaviy Falastin taomi – “kake” pechenesini tayyorlashni boshladi. Ayollar ilgari Isroil bombalariga uchragan maktabning bir sinfida bayram pishiriqlari tayyorlash uchun birga ishlasa, boshqa bir sinfda ularni loydan yasalgan pechlarda pishirmoqda. Bolalar ham onalariga idishlarni ko‘tarishda yordam berish orqali bayramga tayyorgarlikda qatnashmoqda.

Bayram pishiriqlarini pishirish bilan band bo‘lgan ayollar Isroil hujumlari va blokadasini vaqtincha unutganga o‘xshaydi. Biroq ular qalblarida chuqur og‘riqni his qilishda davom etishlarini aytmoqda.

“Biz yaqinlarimizdan ko‘pini yo‘qotdik. Bayram juda g‘amgin muhitda o‘tadi. Biz hali ham azob chekyapmiz. Blokada bizga katta azob-uqubatlar keltirmoqda. Ovqat pishirish uchun gazimiz yo‘q. Hayot uchun zarur bo‘lgan hech narsa yo‘q”, deydi loy tandirda pishiriq pishirayotgan Kavser Husayn “Anadolu” agentligiga. 

U ayollar qo‘lidan kelganini qilishga harakat qilishayotganini, chunki Falastin xalqi hayot va muhabbatga loyiq ekanini ta’kidlaydi. Uning so‘zlariga ko‘ra, g‘azoliklar shu kuni o‘z farzandlari va yaqinlariga ozgina bo‘lsa-da quvonch bag‘ishlamoqchi. Ayollarning aytishicha, bu ular uchun eng qayg‘uli bayram, lekin uning ma’nosini tushunish ham muhimdir.

Shuningdek, Kavser Husayn g‘azoliklarning tabiiy gazdan foydalanish imkoniyati yo‘qligini va Ramazon oyida ular ba’zan iftorga ovqat tayyorlashga vaqtlari bo‘lmasligini esladi, chunki olovda ovqat pishirish juda uzoq davom etadi.

Yana bir g‘azolik ayol Ummu Muhammadning aytishicha, bu yil chegara darvozalari yopiqligi va gaz yo‘qligi sababli ular avvalgi bayramlarga qaraganda ancha kamroq pechene pishirishga muvaffaq bo‘lishdi. Uning so‘zlariga ko‘ra, ayollar tayyorlagan pechene uch-to‘rt oilagagina yetadi. 

“Bolalar bayramni maroqli o‘tkazishi uchun barcha sa’y-harakatlar qilinmoqda. Ular bizdan bayramona liboslar kutishadi, biz esa ularni pechene bilan yupatamiz”, deya ta’kidladi falastinlik ayol.

Ma’lumot uchun, G‘azodagi insonparvarlik inqirozi kundan kunga kuchayib bormoqda, Isroil sulhning 42 kunlik birinchi bosqichi va HAMAS bilan asir almashish kelishuvi yakunlanganidan so‘ng, 2 mart kuni G‘azo sektoriga gumanitar yordam yetkazishni to‘xtatishga qaror qildi. 

Isroil armiyasi 19 yanvar kuni kuchga kirgan o‘t ochishni to‘xtatish kelishuvi tugaganidan so‘ng, 18 mart kuni ertalab blokadadagi G‘azo sektoriga intensiv hujumlarni davom ettirdi. Yangilangan hujumlardan buyon 896 dan ortiq falastinlik, asosan keksalar, ayollar va bolalar halok bo‘ldi, 1984 dan ortiq kishi jarohat oldi.

O‘t ochishni to‘xtatish kelishuvini buzgan Isroil, “yangi o‘t ochishni to‘xtatish bo‘yicha takliflarni rad etish”ga javoban HAMASga qarshi harbiy kuchini oshirib harakat qilish niyatida ekanini ma’lum qildi. HAMAS, o‘z navbatida, Isroilni va’dalarini bajarmaganlikda ayblab, mamlakat “G‘azo sektorida Falastin xalqiga qarshi genotsid”ni qayta boshlaganini va o‘t ochishni to‘xtatish bo‘yicha vositachilar oldidagi majburiyatlarini bajara olmaganini aytdi.

2023 yilning 7 oktyabr kuni Isroilning G‘azo sektoriga hujumlari boshlanganidan beri halok bo‘lgan falastinliklar soni 50 ming 251 nafarga, yaradorlar soni esa 114 ming 25 nafarga yetdi.

Isroil fuqarolik infratuzilmasi va shifoxonalarni ham nishonga olib, mintaqada gumanitar falokatga sabab bo‘ldi. Suv va elektr ta’minotining uzilishi va chegara o‘tish joylarining yopilishi G‘azoda falastinliklar duch kelgan og‘ir sharoitlarni yanada yomonlashtirmoqda.