Fransiyaning sobiq prezidenti olti oylik qamoq jazosiga hukm qilindi

Parij apellyatsiya sudi Fransiyaning sobiq prezidenti Nikolya Sarkozining 2012 yildagi saylovoldi kampaniyasini moliyalashtirgani uchun berilgan jazoni olti oylik qamoq jazosiga qisqartirdi. Bu haqda “France 24” xabar berdi. 

Dastlab, 2021 yilda Sarkozi bir yil qamoq jazosiga hukm qilingandi. Unga jazoni uyda o‘tashga ruxsat berilgan, lekin muddat elektron bilaguzuk bilan o‘talishi kerak bo‘lgan.

Apellyatsiya sudi bu muddatni olti oyga qisqartirishga qaror qildi. Shunday qilib sobiq prezident yana olti oy shartli qamoq jazosini o‘tashi kerak. 

Gap “Bygmalion ishi” haqida ketmoqda. Sarkozi 2012 yilgi saylov kampaniyasiga xizmat qilgan PR agentligi shunday nomlanadi, unda Sarkozi Xalq harakati uchun ittifoq partiyasidan nomzod sifatida qatnashgan.

Prokurorlarning ta’kidlashicha, siyosatchi o‘zining 2012 yilgi saylovoldi kampaniyasiga deyarli 43 million yevro sarflagan, bu ruxsat etilgan 22,5 million yevrodan deyarli ikki barobar ko‘p (Fransiya saylovoldi tashviqoti xarajatlariga qattiq cheklovlar qo‘yadi).

Ortiqcha xarajatni yashirish uchun “Bygmalion” agentligi partiyaning saylovoldi shtabiga 10 million yevro miqdoridagi xizmatlar uchun soxta hisob-fakturalarni taqdim etgan, biroq tergov aniqlaganidek, bu xizmatlar aslida taqdim etilmagan.

Tekshiruv davomida ortiqcha sarf-xarajatlar miqdori deyarli ikki baravarga oshgan.

Sarkozi bilan birga yana 13 kishi aybdor deb topilgan. Sobiq prezident o‘z aybini tan olmagan. Tergov sxemani tashkillashtirishga siyosatchi rahbarlik qilganini isbotlay olmagan.

Bu Nikolya Sarkoziga qarshi birinchi hukm emas. 2023 yil may oyida telefon tinglash ishi bo‘yicha apellyatsiya shikoyati bo‘yicha u uch yilga ozodlikdan mahrum qilindi, shu jumladan ikki yil shartli, ammo bu qaror hozirgacha kassatsiya sudiga shikoyat qilingan. Kelgusi yilda esa sobiq prezident 2007 yilgi prezidentlik kampaniyasini Liviya moliyalashtirganlikda gumon qilinib sudlanadi.

Ma’lumot uchun, Sarkozi Fransiyani 2007-2012 yillarda boshqargan.