Fransiyaning sobiq prezidenti qamoqdan ozod qilindi

Fransiyaning sobiq prezidenti Nikolya Sarkozi saylov kampaniyasidagi noqonuniy xarajatlar bo‘yicha ish doirasida muddatidan oldin shartli ravishda ozod qilindi. Bu haqda RTL radiostansiyasi xabar berdi.

Ma’lumotlarga ko‘ra, sud 71 yoshli Sarkozining yoshi sababli jazoni yengillashtirish haqidagi iltimosini qanoatlantirgan. Qaror 7 maydan kuchga kiradi.

Gap Sarkozining 2012 yilgi prezidentlik saylov kampaniyasiga xizmat ko‘rsatgan Bygmalion PR-agentligi bilan bog‘liq ish haqida ketmoqda. Sud siyosatchining partiyasi Bygmalion’dan 18 million yevrodan ortiq mablag‘ olganini va bu xarajatlar rasmiy hisobotga kiritilmaganini aniqlagan.

Shu sabab Sarkozi bir yil qamoq jazosiga hukm qilingan edi. Keyinchalik jazo olti oyga qisqartirilib, qamoq o‘rniga elektron bilaguzuk taqish imkoniyati berilgan. RTL ma’lumotiga ko‘ra, endi siyosatchi elektron bilaguzuk ham taqmaydi.

Nikolya Sarkozi 2007–2012 yillarda Fransiya prezidenti bo‘lib ishlagan va qamoq jazosini olgan ilk sobiq Fransiya prezidenti hisoblanadi.

Bygmalion ishidan tashqari, u yana ikki jinoyat ishi bo‘yicha aybdor deb topilgan.

2021 yil mart oyida Sarkozi korrupsiya va France Court of Cassation xodimini pora bilan og‘dirish ishida aybdor deb topilgan. O‘shanda u bir yil qamoq va yana ikki yil shartli jazoga hukm qilingan, biroq real qamoq muddati qisman uy qamog‘i va elektron bilaguzuk bilan almashtirilgan edi.

2025 yil sentyabrida esa, Sarkozi Muammar Kaddafi hukumati tomonidan 2005–2007 yillarda uning saylov kampaniyasini moliyalashtirish bo‘yicha jinoiy til biriktirish ishida aybdor deb topilgan.

Sud unga besh yil ozodlikdan mahrum qilish jazosi tayinlagan, ammo hukm ijrosi keyinga qoldirilgan. 2025 yil oktyabrida Sarkozi 20 kun qamoqda bo‘lib, keyinchalik sud nazorati ostida ozod qilingan. Hozirda ushbu ish bo‘yicha apellyatsiya jarayoni davom etmoqda.

Eslatib o‘tamiz, avvalroq AQSHning Fransiyadagi elchisi Charlz Kushner yaqinda qisqa muddatga qamoqqa jo‘natilgan Fransiyaning sobiq prezidenti Nikolya Sarkozi bilan qamoqxonanada uchrashish uchun ruxsat so‘ragan va sud unga bunday uchrashuvga ruxsat bergani haqida xabar berilgandi.