Fransiyada tartibsizliklar kuchaydi, Makron namoyishlarni taqiqladi

Fransiya Prezidenti Emmanuel Makron mamlakatda tartibsizliklar keltirib chiqarishi mumkin bo‘lgan noqonuniy namoyishlar taqiqlanishini bildirdi. U so‘nggi tartibsizliklarda so‘l radikal guruhlar va vandallarni aybladi. Bu haqda “Reuters” xabar berdi.

Makron kecha, 22 oktyabr kuni razvedka rahbarlari va yuqori martabali vazirlar bilan uchrashuvdan so‘ng shunday bayonot berdi. Uning aytishicha, kasaba uyushmalari kabi tashkilotlar tomonidan o‘tkaziladigan namoyishlarga ruxsat berilishi mumkin, biroq tadbirlar xavfsizlikni ta’minlash va biznes ob’ektlarini himoya qilish maqsadida boshqa yo‘nalishlarga ko‘chirilishi mumkin.

Fransiya Adliya vaziri Jerald Darmanen esa namoyishlar taqiqiga bo‘ysunmagan shaxslarning saylov huquqini vaqtincha to‘xtatib turish va zo‘ravonlik, talonchilik yoki politsiyaga hujumlarda ishtirok etganlarning ijtimoiy tarmoqlardan foydalanishini cheklash taklifini ilgari surgan.

Mamlakatning ikkinchi va uchinchi yirik shaharlari Marsel hamda Lionda shanba kuni o‘tkazilishi rejalashtirilgan barcha namoyishlar taqiqlangan. Biroq talabalarning asosiy uyushmasi UNEF shu kuni miting o‘tkazishni rejalashtirgan. 2018 yilda paydo bo‘lgan “Sariq nimchalilar” harakati ham Parij markazida namoyish o‘tkazish uchun ariza bergan.

Kutilayotgan tartibsizliklar sababli Parij markazidagi ayrim do‘konlar oyna va vitrinalarini yog‘och taxtalar bilan himoyalay boshlagan. Hermes lyuks mahsulotlari kompaniyasi ham Fransiyadagi do‘konlarida xavfsizlik choralarini kuchaytirgan. Parijda o‘tkazilayotgan xalqaro Art Basel san’at yarmarkasi tashkilotchilari esa tadbirni dam olish kunlari davomida yopishga qaror qilgan.

Fransiyadagi noroziliklar joriy yilning 17 oktyabr kuni zo‘ravonlik va talonchilik holatlari bilan keskinlashgandi. Namoyishlar ortida energiya narxlarining oshishi, aholi xarajatlarining ko‘payishi va davlat xizmatlari sifati yomonlashayotganidan norozilik yotgani aytilmoqda. Hodisalardan so‘ng Limoj shahar hokimligi binosiga o‘t qo‘yish holati yuzasidan ikki kishi hibsga olingan.

Mamlakatdagi siyosiy kuchlar tartibsizliklar uchun bir-birini ayblamoqda. Hukumat so‘l radikal guruhlarni vaziyatni keskinlashtirishda ayblagan bo‘lsa, namoyishlar ortidagi ijtimoiy-iqtisodiy muammolar jamoatchilik noroziligining asosiy sabablaridan biri bo‘lib qolmoqda.

Shu bilan birga, Fransiya iqtisodiyotidagi xavotirlar moliya bozorlarida ham aks etgan. 22 oktyabr kuni mamlakatning 10 yillik davlat obligatsiyalari daromadliligi 5,14 foizga yetgan. Bu 2002 yil iyulidan beri kuzatilmagan eng yuqori ko‘rsatkichdir. Fransiya davlat qarzining Germaniya obligatsiyalariga nisbatan tavakkalchilik ustamasi ham so‘nggi 15 yildagi eng yuqori darajaga ko‘tarilgan.

Eslatib o‘tamiz, avvalroq Fransiya Prezidenti Emmanuel Makron mamlakatda yuz bergan tartibsizliklardan xorijiy yetakchilar saylovoldi maqsadlarida foydalanayotganini aytgan edi.