Fransiyada Marin Le Pen ustidan sud boshlandi

Bugun, 30 sentyabr kuni Parij jinoiy sudi Marin Le Pen boshchiligidagi Fransiyaning o‘ta o‘ngchi Milliy birlik partiyasi rahbariyati ustidan sud jarayonini boshladi. Siyosatchilar Yevropa Ittifoqi mablag‘larini o‘zlashtirganlikda va Yevroparlament deputatlarining yordamchilarini soxta yollash yo‘li bilan partiyani yashirincha moliyalashtirganlikda ayblanmoqda. Bu haqda “Le Monde” xabar berdi.

Ushbu ayblov uchun eng ko‘p jazo o‘n yilgacha ozodlikdan mahrum qilishdir. Umumiy zarar qariyb 7 million yevroga baholanmoqda. Ma’lum qilinishicha, Marin Le Pen bu summaning 330 ming yevrosini Yevroparlamentga qaytarib bergan.

Marin Le Pen aybdor deb topilsa, u 2027 yilgi prezidentlik saylovlarida qatnasha olmaydi.

Ayblov xulosasiga ko‘ra, Milliy birlikdan Yevroparlament deputatlariga yordamchi sifatida yollangan odamlar aslida Yevropa Ittifoqidagi vakillari uchun emas, balki shaxsan Le Pen yoki uning partiyasi uchun ishlagan.

Shunday qilib, Terri Lejerning “yordamchilari”dan biri partiya asoschisi Jan-Mari Le Penning qariyb yigirma yil davomida qo‘riqchisi bo‘lgan, keyinroq u Marin Le Penning qo‘riqchisiga aylangan.

Le Penning kotibi, bir muddat uning kelini bo‘lgan Ketrin Griset ham Yevroparlament deputatining yordamchisi sifatida qayd etilgan. Biroq Grisening kirish kartasi ma’lumotlariga ko‘ra, u yil davomida Yevropa Parlamentida atigi bir yarim ish kunini o‘tkazdi. Ketrin Grisetning ta’kidlashicha, u har doim Le Pendan keyin binoga kirgan va kirish kartasidan foydalanmagan.

Marin Le Pen bilan birga uning singlisi Jan va sobiq sherigi Lui Alio ham sudlov mahkamasida edi. Marin Le Penning otasi, 96 yoshli Jan-Mari Le Pen ham ayblanuvchilar ro‘yxatida, biroq unga sog‘lig‘i sababli sud majlislarida qatnashmaslikka ruxsat berilgan. Ishda jami 27 kishi ishtirok etmoqda, sud majlislari noyabr oyining o‘rtalariga qadar davom etadi.

2015 yilda Parij prokuraturasi Yevroparlamentdagi Milliy front vakillari 20 ga yaqin xodimni noto‘g‘ri yollagani haqidagi shubhalar yuzasidan tergov boshlagan edi. Prokuratura bu odamlar Yevroparlamentdan maosh olgani haqidagi ma’lumotni tasdiqladi, garchi aslida ular Milliy frontda ishlashda davom etgan.

2018 yilda Yevropa Ittifoqi Adliya sudi Jan-Mari Le Pen va uning hamkasbi Bruno Gollnish bilan bog‘liq xuddi shunday ish bo‘yicha qaror chiqargan edi. Keyin sud siyosatchilar Yevroparlamentga yuz minglab yevrolarni qaytarishi kerak degan qarorga keldi.